Mawkyrwat, Nailar 11 : Ki Pulit ka South West Khasi Hills District ha ryngkat ki BSF bad ki paidbah na ka Shnong Kaitha Kona mynta ka sngi ki la ïoh ban bat noh sa uwei u briew uba la suba don kti lang bad ki runar kieng atiar.
Katkum ka khubor ba la ioh na u Khliehduh jong ki Pulit ka South West Khasi Hills District, u bah B. Jyrwa, MPS , la ong ba ka jingïoh ban bat ïa utei u runar uba kyrteng u Akram na Jenaghati ka dei ha ka 11/08/2025 ha ka por kumba 4:30 ei ei janmiet.
“Ka jingïoh bat ïa u ka dei ha shnong Kaitha Kona lyngba ka jingïatreilang jong ki paidbah nongshong shnong”, ong u SP.
Ym tang kata, la ïathuh ruh ba ïa une u briew la pynkit noh sha Maheshkhola PHC ban ïoh ïa ka jingsumar.
