10 klur mang ka sorkar ban shna madan Artificial Turf ha Nongsder, buh mawnongrim u myntri

Nongpoh, Jymmang 13: Ban nang kyntiew ïaka kam ïalehkai haka jylla khamtam ba ki khun samla kin ioh ban pynkhreh naka bynta ka National Games ka ban sa long haka jylla Meghalaya, u Bah Shakliar Warjri Myntri ka tnad ïalehkai sports haka jylla mynta ka sngi u la leit ban buh mawnongrim naka bynta ban shna ïaka madan phlang plastic ne ka artificial turf haka shnong Nongsder.
Ïa katei ka madan ïalehkai ka ban sa shna janai katkum ka juk ba mynta la mang pisa haduh T.10 klur ka ban don naduh ki jaka khreh kiba paka bad kiwei kiwei ki jingdonkam.
Ha katei ka sngi buh mawnongrim ban tei ïaka madan phlang plastik, la sakhi ruh da ka jingdon u Damanbait Lamare, MLA Umroi, u Bah DP Wahlang, Chief Secretary ka sorkar jylla, u D.D Shira, Director of Sports & Youth Affairs, u Bah Jonas Lyndem, Rangbah Shnong Nongsder, ki riew rangbah ka thaiñ lem bad ki paidbah jong ka shnong Nongsder.
U Bah Shakliar Warjri kum u kongsan haba kren ha katei ka sngi u la pynpaw ka jingsngewkmen ba ka sorkar jylla lyngba ka tnad ïalehkai kala mang pisa haduh 10 klur ban shna ïa katei ka madan ïalehkai naka bynta ka jingbit jingbiang jong ki samla ïalehkai ka jylla, lyngba ka jingtrei shitom jong u MLA ka thaiñ bad ngeit skhem lyngba ka jingdon jong katei ka madan kan long ka jingkyrkhu ïaki khun samla ba kin ioh ban kilan bad pyntbit bha ïalade.
Kum u myntri ka tnad ïalehkai u don ruh ka jingangnud ba ki khun samla ka jylla kin lah ban lehkai bha ha ki jinglehkai haka National Games ban long haka jylla Meghalaya ha u snem 2027 ryngkat ki takma.