Nongpoh, Rymphang, 11: Watla ka sorkar ka ju pynshlur ïa ki khun samla ban ïeng hala ki jong ki kjat ban sengkam sengjam lajong khamtam ban pynleit jingmut ruh ha ka kam ri jingri, hynrei phewse bun na ki samla kiba la sdang ban ieng hala ki jong ki kjat da ka kam ri syiar ki la sdang ban kynran dien noh tang hadien katto katne por wat hadien ba ki la leit ban pyntbit bad pyndep ïa ki jinghikai bapher bapher namar ka jingshah khñiot ka dor jong ka syiar bad kim nud shuh ban bteng ban pyniar ne pynheh ïa ka kam ri syiar namar la bun satang ka jinglut jingsep naduh ka bai jingbam, u skop dieng, ki dawai dashin bad kumta ter ter.
`Halor katei ka jingeh bad ka jingud jingnam jong ki nongri syiar, ki nongïalam jong ka Ri-Bhoi Poultry Farmers Association, ba kynthup ïa ka kong E Lapang President, u Bah Antonio Lapang Adviser, Bah A Diengdoh Vice President, Bah P Tmung Senior Adviser lem bad ki dkhot mynta ka sngi ki la mih shakhmat ban pynpaw ka jingsngewkhia halor katei ka jingeh bad ba ka sorkar ka dei ban peit mardor ïa ka jingeh kaba ki nongri syiar ki mad bad ïakynduh namar ban shu die ha ka dor kaba tad khlem jingmih kam myntoi shuh ïa ki ban bteng ïa ka kam ri syiar, satang ba ki khun samla kin khang khyrdep noh syndon ïa ki sem syiar jong ki.
Haba kren sha ki lad pathai khubor kitei ki nongïalam ki la kynnoh ruh ba ka daw tynrai hi ka jinghiar jong ka dor syiar, ka dei namar ka jingtuid palat jong ki syiar kiba nabar jylla, kaba la pyniap pat ïa ki nongri syiar ha kane ka jylla, khamtam ka Ri-Bhoi ba bun ki nong ri syiar, namar kumba la ioh lum jingtip na ki nongri syiar ïa ka dor la buh hi da ki nongthied bad khñiot beiñ ha ka dor kaba tad khlem jingmih shuh bad kane ka la wanrah ka jingduhnong kaba khraw namar don ruh kiba shu shim da ka ram ka shah, tang biang ka kam da ka jingkyrmen ban ioh siew biang ïa ka ram lada lah ban die ha ka dor kaba biang, hynrei phewse baroh ki long mar khongpong.
Related Posts
Ki la ong ruh ba ka sorkar ka don ïa ka Piggery Mission, ka Milk Mission bad kiwei kiwei kum ki nongri syiar ki la kyrpad ruh sha ka sorkar ba ka dei ban thaw ki lad ki lynti ban kyntiew sa ka kam ri syiar khnang ba kan long ka jingmyntoi bad ai mynsiem ïa ki nongri syiar ha ka them Ri-Bhoi bad ka jylla baroh kawei.
Ki la ong ruh ba ka jylla Assam bad kiwei kiwei ki jylla ki ju kyrshan ïa ki nongri syiar naduh u jingbam, ki symbai lyngba ki skhim bad ki subsidy bala ïarap da ka sorkar hynrei haduh mynta ka jylla jong ngi kam don kano kano ka jingïarap ha kaba ïadei bad ki nongri syiar, namarkata ki la kyrpad ïa ka sorkar ba kan thaw ki lad ki lynti ban ïarap bad kyrshan ïa ki nongri syiar bad khamtam kum ki nongïalam ki la buh ruh ka jingkyrpad sha ka sorkar ba kan phaikhmat lem ïa ka jingeh ba mad da ki nongri syiar.
Shuh shuh kum ka seng ki la pynsngew ruh ban don noh ki jaka talasi ïa ki syiar ba wan nabar la ki long ne em kiba shngaiñ ban bam, namar ki bun ruh ki syiar kiba iap ha shiteng lynti namar lada ka sorkar hi kan shimkhia ki lad ki lynti ban peit kyrpang ïa ki nongri syiar kan long ka jingkyrkhu ïa ki ba kim donkam ban da shaniah than ha ki syiar ba nabar hynrei ban kyrshan da ki nongri syiar na ka jylla lajong.
Haba ioh ban ïakren bad katto katne ki nongri syiar ki la pynpaw ka jingsngewkhia kaba jur halor ka jingshah khñiot ka dor, namar lada long ha kane ka rukom kam myntoi satia ïa ki ban bteng ban ri ïa ka syiar hynrei satang ban khang khyrdep noh ïa ki sem syiar, namar ka long kumba pynri bad pynmyntoi ïa kiwei namar lada ka dor na ki nongri ka hiar makna hynrei ka dor jong ka doh syiar kaba ju die ha ki iew ki hat ka neh kumjuh bad kam don jingkiew jinghiar.