Lahduh ka Padu United haka Lower, ka Lamin XI haka Upper Division haka phutbol ka ASSA
Amlarem, Rymphang 05: Ka lynpung ïalehkai phutbol jong ka Amlarem Football League 2024-2025 bala pynïaid da ka Amlarem Sub-Divisional Sports Association (ASSA), ha Madan phutbol ka Jaraiñ West Jaiñtia Hills District, kala poi sha ka jingakhun Final mynta ka sngi 5 tarik u Rymphang ha ki ar tylli ki kyrdan kata ka ‘Lower Division’ bad ka ‘Upper Division’.
Haba phai sha ka jingïakhun phainal haka kyrdan Lower Division, naka liang ka kynhun ïalehkai jong ka Padu United kala jop da 1-0 kol ïa ka Padu Masku. Ïa katei ka shikol la thep da u Banjop Pohlong uba phong ïa ka Jersey no 12 haka minit ba 44. Lyngba kane ka shikol ka Padu United kala long syndon ka lahduh.
Ïa ka nam Top Scorer la ïoh da u Banjop Pohlong, Best Goalkeeper la ïoh da u Diborlang Langshiang, ïa ka nam Man of the Match la ïoh da u Pynskhem Mukhim, kine baroh lai ki rangïalehkai ki dei na ka Padu United.
Katba haka jingïakhun phainal jong ka kyrdan Upper Division kaba la long hapdeng ka kynhun ïalehkai jong ka Lamin XI pyrshah ïa ka Sohlawiat SC kila ïakhaid da mar shikol 1-1 haduh ba kut jong ka por ïakhun. Ïa ka kol naka Lamin XI la thep da u Lakhon Lamin ba phong ïa ka Jersey no 12 haka minit ba 40. Katba ïaka kol naka Sohlawiat SC la thep da u Lapynbiang Khongshah ba phong ïa ka jersey no 5 haka minit ba 80.
Da kane ka jingïakhiad na ka liang ki bor pynïaid jong kane ka lympung kiba hap ban pynïakhun nohda ka jingïashut Tie Breaker ha kaba ka kynhun ïalehkai jong ka Lamin XI kala jop da 5-3 kol.
Ïa ka nam Top Scorer la ïoh da u Fullme Khongiong na ka Sohlawiat SC, ïa ka nam Best Goal Keeper la ïoh da u Laiky khonglah naka Lamin XI, katba ïa ka nam Man of the Match la ïoh da u Lakhon Lamin naka Lamin XI
Ïa ki khusnam sha ki nongjop la sam da u kongsan uba dei ruh u MLA ba rim ka thaiñ u ma Stephanson Mukhim, ha ka jingdonlang ki MDC ma Het Pohthmi bad u ma Holando Lamin, nalor ki dkhoh ka Amlarem Sub-Divisional Sports Association bad kiwei de.
La pyntip lashai ka sngi 06/02/2025 ka jingïakhun phainal kan long hapdeng ka Seinbhalang Shkentalang pyrshah ïa ka Amlarem Social Club haka por 1 baje nohphai sngi.