Shillong, Rymphang 05: Ka Slog Warriors bad ka Lagan 2.0 ki la pynthikna ban rung sha ka Quarter final ha ka Shillong Cricket League Third Division 2024-25 jong ka Shillong Crciket Association hadien ba ki la jop ïa ka jingïakhun pre quaterfinal hynne ka sngi Balang, ha madan Urkaliar, Shillong. Ka Slog Warriors ka la lah ban pynliem ïa ka Solidarity CC da 5 wiket, katba ka Lagan 2.0 ka la jop da 20 ron ïa ka Youngstar.
Ha ka jingïalehkai kaba nyngkong ka Slog Warriors ka la rai ban tied nyngkong hadien ba jop ïa ka jingkynting pisa, bad haba shimti ban tied nyngkong ka Solidarity CC ka la shah pynkut noh da tang 67 ron naba khyllem baroh 10 wiket ha ka 12.5 over.
Dei tang u Ashmit uba la kamai bun ron, kata da 22 ron naki 25 bol. Napdeng ki rangkawang bol ka liang pyrshah, u Imroz (3.5 over: shah tied 14 ron: khur 4 wiket) bad u Manivannan (2 over: shah tied 12 ron: khur 2 wiket) ki dei kiba seisoh tam.
Haba kthong ïa ka ron ba la buh, ka Slog Warriors ka la lah ba kan kamai 69 ron bad hap tang 5 ngut ki nongtied naki 9.3 over ban jop ïa ka jingïalehkai da 5 wiket. U Prabhakar u la kamai 23 ron naki 26 bol, katba u Subhakar u la kamai 10 ron naki 5 bol. ïa ka nam Player of The Match la khur da u Imroz uba la khur 4 wiket.
Ha ka pre quaterfinal kaba bud, ïa ka toss la jop da ka Youngstar kaba la aiti ïa ka Lagan 2.0 CC ba kan tied nyngkong kaba la lah ban kamai 178 ron haduh kaba kut jong ka 20 over ba la mang bad hap 6 wiket.
U Subhash u la kyrshan da kaba kamai 54 ron naki 32 bol, katba u Mukesh u la tied 45 ron naki 32 bol.Dei tang u Ashisk uba la seisoh ha ka bowling da kaba khur 2 wiket naki 4 over bad ailad tang 26 ron naki bol jong u.
Haba pyrshang beh ïa ka thong ka Youngstar ka la shah khanglad noh da tang 158 ron naba shah pynhap baroh 10 wiket ha ka 19.3 over. Na ka liang jong u Md.wahid u la lah ban kamai 31 ronn naki 22 bol katba u Manan u la ïarap 27 ron naki 12 bol, watla ki la lehkai bha hynrei ka kynhun ka dang sahdien da 20 ron ha kane ka jingïalehkai.
Ha ka liang ki nongkawang bol, u Aniket (4 over: shah tied 19 ron) bad u Mukesh (3 over: shah tied 13 ron) ki la ïoh ban khur mar 2 wiket ha kaba ka Lagan 2.0 ka la jop ïa ka jingïakhun da 20 ron. ïa ka nam Player of The Match la khur da u Subhash uba la kamai 54 ron.
