Shillong, Rymphang 05: Ki ar tylli ki jingïalehkai ha ka 4th District League T20 Cricket Tournament 2024 ba la pynïaid da ka East Khasi Hills Cricket Association [EKHCA] ba la long hynne ka sngi Balang ki la jam sha kaba kut ha kaba ka Sportopia Sports Club lem bad ka Pomshutia ki la ïoh ban khur ïa ka jingjop. Ka Sportopia Sports Club ka la lah ba kan pynliem ïa ka Mawmluh CC da 41 ron, katba ka Pomshutia ka la jop da 8 Wiket.
Ka Sportopia Sports Club ka la shimti ban tied nyngkong ha kaba ka la lah ban kamai 133 ron haduh kaba kut jong ka 20 ober ba la mang bad hap 7 wiket, u Jedilbert Swer u la long uba seisoh tam ha ka tied da kaba kamai 46 ron naki 59 bol. Na ka liang ki rangkawang bol ka liang pyrshah, u Pynbhalang Lyngdoh u la khur 2/23 naki 4 ober.
Haba beh ïa ka thong ka Mawmluh ki la khyllem lut baroh 10 ngut ha ka 18.2 ober bad ka kynhun ka la ïohlad ban kynjoh tang 92 ron, dei tang u Sankupar Sohkhlet (25 ron naki 18 bol) uba la lah ban kamai kham bun ron ïa ka kynhun.
U Jedilbert Swer (ba khur ïa ka Player of the Match) u la khur 3/32 naki 4 ober bad ka Sportopia Sports Club ka la jop da 41 ron.
Ha ka jingïalehkai kaba bud, ka Mawphlang ka la tied tang 99 ron khyllem baroh 10 wiket ha ka 18 ober, u Janai Dohtdong u la kamai 22 ron naki 26 bol. U Shembhalang Pyngrope u la khur 3/15 naki 4 ober.
Haba jubab ka Pomshutia ka la tied tam haduh 102 ron hap tang 2 ngut naki 11.1 ober. U Shembhalang Pyngrope uba la khur ïa ka nam Player of the Match, u la kamai 54 ron naki 35 bol kaba la ïarap ïa ka Pomshutia ban jop da 8 wiket.
