272 ngut ki kyrtong ïakhun elekshon, 158 ngut ha KHADC, 114 ngut ha JHADC

Shillong, Rymphang 04: Ki don baroh 272 ngut ki kyrtong ki ban ïakhun ïa ka elekshon MDC mynta u snem 2025 sha ki ar tylli ki Autonomous District Council (ADC) ha rilum Khasi bad ha rilum Jaiñtia.
Ka khubor ba la phah da ki bor pynïaid elekshon ka Sorkar Jylla, ki la pyntip ba kine ki 272 ngut ki kyrtong ki long 158 ngut ki kyrtong kiba ïakhun na ki 29 tylli ki Constituency kiba hap hapoh ka Khasi Hills Autonomous District Council (KHADC) bad 114 ngut ha Jaiñtia Hills Autonomous District Council (JHADC).
Ki kyrtong shynrang kiba ïakhun sha ha KHADC ki long 146 bad 12 ngut ki kynthei katba sha ka JHADC ki kyrtong shynrang ki don 107 ngut bad 7 ngut ki kynthei.
Ki kyrtong kiba la thep kyrteng ha East Khasi Hills ki long 83 ngut, kata, 77ngut ki shynrang bad 6 ngut ki kynthei, ha Sohra Civil Sub-division ki long 9 ngut ki shynrang bad kawei ka kynthei, ha Ribhoi District ki long 23 ngut ki shynrang bad 3 ngut ki kynthei, ha West Khasi Hills ki long 18 ngut ki shynrang bad kawei ka kynthei, ha South West Khasi Hills ki don 11 ngut tang ki kyrtong shynrang, ha Eastern West Khasi Hills ki long 8 ngut bad kawei ka kynthei.
Ki kyrtong kiba thep kyrteng ha West Jaiñtia Hills ki long 57 ngut ki shynrang bad 3 ngut ki kynthei, Amlarem Civil Sub-division 12 ngut tang ki shynrang bad ha East Jaiñtia Hills kiba thep kyrteng tang ki shynrang ki don 38 ngut bad 7 ngut ki kynthei.
Baroh ki kyrtong shynrang kiba la thep kyrteng ban ïakhun ïa ka elekshon ha KHADC bad JHADC ki long 253 ngut bad 19 ngut ki kyrtong kynthei.