Tuh ki runar ïa ki shynrong shyieng u mrad ba la palat 35 million snem ha ri lum Garo

Shillong, Kyllalyngkot 29 : Ki shynrong shyieng ba sah (fossil) jong u mrad ba phylla jong ka juk Prehistoric, ba la antad ba la don mynta kumba 35-40 million snem, kala shah tuh na ka shnong Tolegre, South Garo Hills District, kaba la pynbitar bad pynsngew bynniaw jur ïa ka rukom ai pahara ïa ka jaka ba lap ïa une u mrad hapoh ka Jylla.
Kine ki shynrong shyieng ba sah (fossil), la lap dang ha u bnai Jymmang 2024 da ka kynhun Geo Expedition hadien ka jingleit tih kaba neh palat shibnai. La ngeit ba kine ki shynrong shyieng ki dei jong u mrad bala tip kum u Rodhocetus lane Ambulocetus- ki pateng hynrei jong u dohkha Whale ba mynta.
Ki stad wad bniah na ka Geological Survey of India (GSO) kila leit ban khmih ïa kane ka jaka hynrei ki trai shnong kila shimti halade ban pahara bad ïada ïa kane ka jingshem, kiba la pyrkhing ruh ïa ki nongwei ba kin ïoh rung sha katei ka jaka.
Wat hapdeng ka jingpyrshang jong ki, dang shen kila don ba ot ia ki katto katne ki bynta jong ki shyieng ba sah jong une u mrad.
U Myntri ka Tnad Pule Puthi Rakkam A Sangma bad MLA ka thaiñ, ula pynthikna ïa kane ka jingshah tuh, haba pyntip ba ki trai shnong kila leit ujor da ka ejahar sha ki Pulit ka Siju Police Station.
“Kane ka dei ka jingduh kaba khraw ïa ka Jylla bad ka Ri. Ki Pulit ki dang tohkit bad nga kular ïa phi ba ki briew ba donkti kin sa shah kem” ong u Rakkam haba ïakren bad ki nongthoh khubor.
Ula ïathuh ba ka Sorkar Jylla ka dang thmu ban ker bha ïa kane ka jaka bad ban shna kum ka museum ban ïada bad ban pyni pyrthei ïa kine ki shynrong shyieng ba sah jong une u mrad.
“Ka dei ka jingshem kaba pher bha. Ki stad Geology na shabar kila pyni ïa ka jingthrang ban wan sha katei ka jaka bad kum u MLA ka thain, nga la tynruh ban shna ïaka museum”.
Ki Nongshong shnong kila dep ker ïa kane ka jaka ban ïada ïa kine ki jingshem hynrei kane ka jingshah tuh ka pyni ïa ka jingtlot ka rukom pahara ha kane ka jaka kaba long khlaw ba padun.
“Ka jaka ba lap ïa kine ki shynrong shyieng ba sah ka don hapoh ka khlaw. Wat hapdeng ka jingpyrshang jong ki nongshong shnong, ki don kiba la leit rung tuh shapoh kane ka khlaw bad leh ïa kane ka kam tuh” batai u Rakkam.