Tura, Jymmang 22 : U Myntri Rangbah ka Jylla Conrad K Sangma ha ka sngi Thohdieng, ula buh ïa u mawnongrim ban pyntrei ïa ka People’s College ba 8 klur tyngka ha New Tura, ka PASF-Abong Noga College kaba pynïaid da ka P.A Sangma Foundation.
Kane ka project ka dei kaba la bei tyngka da ka DORF Ketal Chemicals Ltd hapoh ka prokram Corporate Social Responsibility (CSR)- kaba la dep ban pynlait ïa ka instalment ba nyngkong kaba long 5 klur tyngka. ïa kane ka jingtei yn pyntreikam hadien ka jingïasoi ïa ka Memorandum of Understanding ha ka 26 tarik Naiwieng, 2025 hapdeng ka P.A Sangma Foundation, Dorf Ketal Chemicals Ltd, and ka Ira Gurukul Educational Trust.
Ha kane ka sngi, u Myntri Rangbah ula plie ruh ïa ka Conference Hall ba dang shu dep tei thymmai jong ka College.
Haba ai jingkren ha ka jingïalang, u Myntri Rangbah ula batai ïa kane ka sngi kum “ka por kaba kongsan bad kaba donbok” haba pynkynmaw ba ka jingphohsniew ban seng ïa ka skul Higher Secondary bad College ka dei kaba la pyrkhat nyngkong eh da u (L) Purno Agitok Sangma.
“Ka pule puthi ka dei kaba kongsan eh na ka bynta u (L) PA Sangma” ong u Myntri Rangbah bad bynrap “Ula sdang ïa ka kam kum u nonghikai, bad ha shilynter ka jingim, ka mynsiem ban hikai ka la neh sah bad paw ha ka rukom pynïaid ïalade ha man ki kam ba u leh- la ka long kum u nongthoh khubor, u nongsaid aiñ, u dkhot ka Parliament, u Myntri Rangbah ka Jylla, u Lamphang ka Lok Sabha lane u President ka National People’s Party”.
U pynpaw ba une u nongïalam ba la khlad noh, u don beit ïa ka jingngeit ha ka ban btin lynti ïa ki samla bad bsut ïa ki jinglong kiba bha, ka akor ka burom bad ka jingtip lem para briew ha ka imlang sahlang. “Ka pule puthi bad ka kam hikai ka dei shisha shibynta jong ka snam jong u naduh kaba sdang ka jingïaid lynti jong u bad ka la ïai neh sah ha baroh shi jingim” ula bynrap.
U Myntri Rangbah ula pynpaw ba wat hapdeng ki jingeh kum ka jingduna jingdon jingem bad jingkyrshan ha ka por ba sdang jong kane ka jaka pule, ka jingthrang jong ka College ka ïai long kaba khlaiñ bad ka bym lah pynkhih. “Mynta, ha kane ka sngi ba kyrpang, ngi ai nam ïa kane ka college bad ïa ka building thymmai sha ka jingkynmaw burom bad ka jingthrang jong u (L) PA Sangma” ula ong.
U Myntri Rangbah ula pynpaw ruh ïa ka jingsngewnguh ïa u Subodh Menon, Chairman Rudin Menon bad ka longïing jong ka Dorf Ketal namar ka jingkyrshan ïa kane ka jaka pule lyngba ka prokram Corporate Social Responsibility (CSR).
“Ka kompani ka lah ban jied ïa kino kino ki jaka pule lane ka Jylla ha ka ri ban kynshew ïa ka CSR, hynrei ki la jied ïa ka PASF-Abong Noga College” ula kynthoh. “Ka synniang jong ki kam dei satia tang ka nam hynrei ki la synniang haduh 8 klur sha ka jingtei ïa ka Iing College thymmai lyngba ka prokram CSR”.
U Myntri Rangbah ula pyntip ba jan 13 percent na ka mang tyngka jong ka Jylla la pynlut ha ka pule puthi marwei bad pynpaw ba katba ka Meghalaya ka don ia network kaba heh duh ha ka pule puthi hapoh ka thaiñ Shatei Lam Mhngi, ka jingpynjanai ïa ka pule pule ka dang long ka jingeh kaba khraw. “Ka jingeh hakhmat jong ngi kam dei shuh halor ka jingdon hynrei ka jingbha” ula ong.
Ula ban jur ba ki jingtei marwei kim lah ban pyni ïa ka jingjop bad ban jur ïa ka jingdonkam ban pynleit jingmut ha ki jingmih na ka pule dangle. “Ka jingtei ïa ka building ka college kam long kaba jop satang lada ka pynkylla ïa ka rukom ai jinghikai kaba bha bad saiñdur ïa ka lawei ki samla pule. Kane ka dei ban ïai long ka thong ba hakhmat eh” ula ong.
Ka PASF-Abong Noga College ka la sdang ïa ka kam pule puthi jong ka ha ka samoi pule 2022 kum ka degree college ha New Tura hapoh ka jingpynïaid ka PA Sangma Foundation. Ka College ka la ïoh ïa ka jingpynïasoh na ka North Eastern Hill University naduh ka samoi pule 2023 bad la ithuh kum ka People’s College hapoh ka Grant-in-Aid scheme jong ka Sorkar Meghalaya ha ka 12 tarik Nohprah 2022.
Ka College ka la ïoh ïa ka kyrteng na ki arngut ki riewpawkhmat jong ka Jaidbynriew A’chik- (L) Purno Agitok Sangma bad u Abong Noga, ïa uba la mane ha ka histori jong ki A•chik na ka bynta ka jingïalam ïa ka jingshong shnong kaba nyngkong eh ha ki lum Garo.
Ha kane ka prokram la wan ïashim bynta da ka Symbud Kongsan Soradini K Sangma, President, P.A.Sangma Foundation, Agatha K Sangma, M.P barim (Lok Sabha) bad Nongaibuit, PASF-Adong Noga College, Dr. Nagesh Telake, President, Navdrushti (NGO), Santosh Jagdhane, Head-CSR, DORF Ketal Chemical India Ltd, Vijay Nair, Ira Gurukul Educational Trust, nalor ki bor pynïaid ka College, ki Nonghikai, ki samla pule bad ki nongïalam shnong ka thaiñ.
