Ka phlim Ha Lyngkha Bneng ka la poi sha ka taiew kaba khatduh ban pyni ha Soso Tham Auditorium

SHILLONG, Jymmang 22: Hadien ba ka la ioh ïa ka jingieid na ki nongpeit ha la shnong bad ka jingiaroh na ki bynta bapher bapher jong ka pyrthei, ka phlim Khasi Ha Lyngkha Bneng The Elysian Field, ba la pynïaid da ka Kurbah Films lem bad ka jingkyrshan na ka Knup Creative bad ka Hello Meghalaya, mynta ka la rung sha ka taiew kaba khatduh jong ka screening ha Soso Tham Auditorium, Shillong ka ban kut haduh 31 tarik u Jymmang 2026.
Kane ka phlim, kaba la leit sha ki film festival kiba kongsan bad kaba la wanrah burom ïa ka Meghalaya, kan dang bteng ïa ka special public screening na bynta ki paidbah jong ka Shillong bad kane ka taiew kaba khatduh kan ai lad ïa ki paidbah ba kin ioh peit khatduh ïa kane ka phlim ha ka big screen bad ban mad ïa kawei ka khana kaba kren shaphang ka ïing, ka jingkynmaw, ka jinglong marwei, ka jingkynriah na shnong, ka paralok bad ka lawei jong ka ri jong ngi kaba dang kylla.
Ka khana jong kane ka phlim ka long ha u snem 2047.Ka pyrkhat ïa kawei ka shnong Khasi, ha kaba tang khyndiat ki briew ki dang sah, namar kiba bun ki la mih noh na ka shnong.Lyngba ka jingsngap, ka jingrkhie, ka music, ka mei mariang bad ki moment kiba sngew briew bha, ka phlim ka buh ïa ka jingkylli kaba don hajan jong ngi: kaei kaban jia ïa ki shnong jong ngi, ki jingkynmaw jong ngi bad ki briew jong ngi lada baroh ki sdang ban ieh noh suki suki?
Ki briew kiba la peit ia kane ka phlim ki la ong ba ka long ka phlim kaba jai jai, kaba ktah ïa ka mynsiem bad kaba pynsngewtynnad ïa ka dohnud.Don kiba la ong ba ka phlim ka shem ia ka jingim wat hapdeng ka jingiap, ka jinglong marwei bad ka jingap.Don ruh kiba la ong ba ban peit ia kum kane ka phlim Khasi ka long kumba ki peit ia kaei kaei kaba long kum ka jingphohsniew, ryngkat ki frame kiba itynnad, ka jingrkhie kaba simple, ka music kaba ktah bad ki character kiba sah ha ka dohnud wat hadien ba ka phlim ka la kut.
Bun ki la sngew ruh ba Ha Lyngkha Bneng kam dei tang ka phlim shaphang ka lawei, hynrei ka dei ruh kum ka peitngor ïa ka mynta.Ka kren shaphang ka jingkynriah na shnong, ka jinglong marwei, ka jinglong tymmen bad ka jingim lang ha ka community, ha ka rukom kaba sngew hajan bha ïa ki lum Khasi.Na bynta ki nongpeit jong ngi hi, kane ka phlim ka kit ia ka jingsawa jong ka iing, ka jingsngap jong ki shnong, bad ka jingpang bad ka jingitynnad jong ka imlang sahlang kaba dang kylla suki suki.
Na ka liang ka kynhun jong kane ka phlim ka iawer ia ki paidbah bad ia ki samla pule kynthup ruh ia ki khynnah skul ba kin wan ban sakhi ia kane ka phlim kaba yn pyni haduh ka 31 tarik mynta u bnai.