Ioh ki lai ngut shipara da ka ïing ba paka ha Mawkasaiñ ba pynshna da ka FKJGP

Mawkasaiñ, Nohprah 24: Ka Federation of Khasi Jaiñtia & Garo People’s (FKJGP) jong ka South East Khasi Border Circle mynta ka sngi ka 23 tarik u Nohprah, 2024 la ïoh ban aiti ïa ka ïing sha ka kong Ïarihun Ïawrod bad ki ar ngut shipara kiba dei ki khunswet na ka shnong Mawkasaiñ, East Khasi Hills District
Lah ban kdew ba ïa ka ïing ba la aiti sha ka kong Ïarihun la pynshna da ka FKJGP ha ryngkat ka jingïasnohkti lang ki paidbah ban ïarap ban pynshna sngewbha.
Ïa ka ïing thymmai la aiti da u Bah Eldie N. Lyngdoh uba dei u General Secretary jong ka Federation of Khasi Jaiñtia & Garo People’s (FKJGP) Central Body ryngkat da ka jingsakhi lang ki paidbah, ki rangbah jong ka shnong Mawkasaiñ, East Khasi Hills District.
Ha shwa ban aiti bad ban ot ïa u ribon, la pynlong ka jingïalang ba lyngkot ba la pynïaid da u Bah Kyrmen Shangdiar uba dei u President ka FKJGP, South Khasi Border Circle ryngkat ka donlang u Chief Acting Syiem Hima Malai Sohmat, ki dkhot jong ka FKJGP bad kiba ha ïing ha sem jong ki lai ngut shipara.
Ym tang kata, ka Federation of Khasi Jaiñtia & Garo People’s (FKJGP) ka la pynpaw ruh ha jingsngewnguh ïa u Bah Smetdar Shangdiar uba ai sngewbha ïa ka jaka sha FKJGP bad sha kine ki khunswet ba kin ïoh ban tei ïa ka ïing ba kin shong kin sah.
Ki nongkren ha kane ka sngi ki la sneng kyntu ïa ki ne ki 3 ngut shipara ryngkat ki kyntien jingkyrkhu kyrdoh ïa kiba ha ïing ha sem bad ha kajuh ka por la ïoh ruh ban pynkyntang ïa kane ka ïing lyngba ka jingduwai na u Tymmen Basan E. Shangdiar bad bud da ka jingot ruh ïa u cake kum ka dak jong ka jingkmen ban pdiang sngewbha ruh ïa ka Christmas bad ïa u snem thymmai ba un long u snem ba dap da ka jingsuk bad jingkmen.