Shillong, Nohprah 19: Ka St Anthony’s Cricket Academy bad ka Shillong Cricket Academy ki la jop ha ki jingïakhun final jong ka U-19 jong ki kynthei bad U-14 jong ki shynrang ha ka lympung ïalehkai kriket ba nyngkong jong ka SYM kaba la tip da ka 1st SYM Inter Academy Tournament hynne ka sngi Palei.
Kine ki ar tylli ki jingïakhun final ki kynthup ïa kine kijuh ki kynhun hynrei ki la ïasam pat ïa ka burom lahduh ha kaba ka St Anthony’s ka la jop ïa ka final jong ki kynthei da 38 ron, katba ka SCA ka la jop ïa ka phainal jong ki khynnah shynrang da 22 ron ha madan Don Bosco Mini Stadium.
ïa kane ka lympung kaba thmu ban kyntiew ïa ka kriket naduh ki kyrdan ba dang khynnah (grassroots level player) la kyrshan tyngeh da ka Meghalaya Cricket Association kum ka seng kmie jong ki kam ïalehkai kriket ha ka jylla.
Haba tied nyngkong, ka St Anthony ka la lah ban kamai 105 ron da kaba hap tang 4 wiket ha ki 15 over bala mang. Ka Dawanshisha Warlarpih ka la seisoh ha ka tied da kaba kamai 38 ron, kiba ka la bynrap da 6 tylli ki four. Ka Isha ka la tied 12 ron bad ka Adelakmen 11 ron ban pyndap ïa ka ron na bynta ka kynhun. Ka Philasyrpai ka la ïohlad ban khur ar wiket ha ka bol.
Haba pyrshang beh ïa ka thong, ka SCA ka la sdang da ka jingsngew skhem ha kaba ka Srijana bad ka Laviola ki la lah ban kamai 14 bad 13 ron. Hynrei hadien ba ki la shah pynkhyllem noh, kiwei pat ki dkhot nongtied ba bud jong ka kynhun kim shym la lah ban noh synñiang shibun bad ka SCA ka la shah pynkut noh da tang 67 ron ha ki 14 over.
Ka Dawanshisha ka la long kaba seisoh tam ha madan da kaba ïoh pynhap lai ngut ki nongtied ka liang pyrshah tang na ka run-out bad ka la ïoh jingkyrshan ruh na ka Adelakmen bad ka Paia, kiba la khur mar 2 wiket. Ka Dawanshisha ka la ïoh ban khur syndon ïa ka khusnam thei ïalehkai ba kynsai lane ka nam ‘Player of the Final’ hadien ba ka la lah ban ïalehkai bha.
Hadien nangta, la sakhi ba ka jingïakhun final jong ki khynnah shynrang watla ka la don ka jingkiew – jinghiar hynrei ka SCA ka la long ka kynhun ba khlaiñbor. Da kaba jop ia ka jingkynting pisa, ka SCA ka la lah ban kamai 110/5. U Gautam u la tied bun ron tam da kaba kamai 36 ron bad u la ïoh jingkyrshan nyngkong eh da u Abdullah bad nangta u Suraj, uba la kamai ïa ka 20 ron kaba stet.
Haba shimti ïa ka pali tied kaba ar, ki khynnah lehkai jong ka St Anthony’s Cricket Academy kim shym la lah satia ban kamai ron kham bun bad ki la shah khanglad ban kamai tang 1 bad 2 ron ha ka tied. U Abhinav Khanal u la ïakhun shitom bad u Ram bad baroh arngut ki la lah ban kamai 18 ron marwei. U Unmukt Deka u la ïaineh marwei khlem shah pynhap da kaba kamai 14 ron.
Ki over ba la mang ki la nang ïaid stet bad ki khynnah SCA ki la lah ban khanglad ïa ki pud kamai ron (boundari), kaba la buh jingeh ïa ka St Anthony’s. U Unmukt bad u Zephaniah ki la ïoh katto katne ki boundari hynrei ki la duna palat, bad ka por ka la dier palat bad ka kynhun ka la shah rem noh da 22 ron.
