Ranikor, Nohprah 19: Ka Southern Border Sports Association (SBSA) ka la ïoh ban pynlong ïa ka taïew lehkmen ba la tip kum ka ‘Ranikor Constituency Week 2024’ da kaba ki la pynlong ïa ka jingïakop ñiah saikil, jngi-um, volleyball, basketball, ïa kop rwai bad shad, ïa kop ‘rang bad ‘thei bhabriew, ïa siat khnam, ïa khun-kti bad ka jingïakop mareh marathon ba la pynlong hapoh ka Ranikor Civil Sub Division, South West Khasi Hills District.
U bah Pius Marweiñ, MLA jong ka Ranikor Constituency uba dei ruh u President jong ka Southern Border Sports Association (SBSA) u la ïa shimbynta lang ha ka jingïamareh marathon bad ha ka jingïakop jngi-um ha kajuh ka por u la plie ruh ïa kane ka Ranikor Constituency Week 2024 kum u kongsan.
Ïa ka jingïakop mareh marathon kaba 6 kilometres la sdang na jingkieng Borbarsing Syiem bad pynkut ha shnong Khatphra bad ïa ka jingïakop jngi-um la pynlong ha wah Umngi ha shnong Umpung bad ïa ki weide ki jingïalehkai la pynlong ha Shnong Ranikor ha kaba la wan ïa shimbynta shitrhem naduh ki rangbah, ki khynnah kynthei bad shynrang ha ki jingïalehkai bapher bapher.
U bah Pius Marweiñ, MLA ka Ranikor Constituency kum u nongïalam u la ong ba ka jingpynlong ïa kine ki jingïalehkai bapher bapher ka long ka sien ba nyngkong kaba dei kum shibynta ban pynshlur ïa ki samla jong ka thaiñ Ranikor ba kin pyni ïa ki sap bapher bapher ba ki ki don bad ka long ruh ka nuksa ban btin lynti ïa ki samla ba kin lah shuh shuh ban ïa shimbynta ha ki bynta ba kham hajrong la ha ka district, ka jylla bad shabar ka jylla bad kane kan ym kut noh tang mynta u snem hynrei ka Southern Border Sports Association kan nang ïai bteng manla u snem ban pynlong kum ïa kine ki jingïalehkai khnang ba kan long ka lad ban kyntiew ïa ki kam ïalehkai ha kane ka dong ka thaiñ.
Ha kane ka sngi la ïoh ruh ban sam da ki syrnod bad ki song pisa sha kiba jop na ka bynta ka jingïakop mareh Marathon, Volleyball, bad ka jingïakop jngi-um.
