Ka ktien Khasi kam dei ban long tang ka tien synrop, hynrei ka don hok ban rung ha Khyrnit ba Phra : KAS

Nongpoh, Nohprah 18: Ka Khasi Authors Society (KAS) shnat Nongpoh ha ka jingïatreilang bad ka Khasi Department jong ka Ri-Bhoi College Nongpoh mynta ka sngi ka la rakhe ïa ka lyngkhuh sngi ïap ba 84 jong u Myllung Soso Tham ha Ri-Bhoi College Nongpoh.
U Bah Mayral Born Syiem MLA ka Nongpoh u la leit ban shim bynta kum u kongsan ha ka jingdonlang u Bah Cosmas Rynshon President ka KAS, Shnat Nongpoh, ka Dr. Elizabeth Kharkongor Principal ka Ri-Bhoi College, ka kong WK Blah Secretary ka Governing Body jong ka Ri-Bhoi College, ka kong W Nongkynrih, HOD Khasi Department Ri-Bhoi College, ki riew shemphang, ki samla pule lem bad ki nonghikai jong ka Ri-Bhoi College.
Haba kren maitphang ha katei ka sngi na ka liang u Bah P Kharshiing Finance Secretary ka KAS u la ong ba kum ka kynhun ki nongthoh kot kim man pat shongthaid ban ïakhun ba ka ktien khasi ka dei ban long ka ktien sorkar bad ban pynrung ïa ka ha ka khyrnit kaba 8 jong ka riti synshar ka ri India, namar kumba long mynta ka ktien khasi ka long tang ka ktien synrop (Associate Official language) watla ka la dei hok ban rung ha ka khyrnit ba 8 jong ka riti synshar na ka bynta ban pynsuk ha ka jingïadei bad ka ktien ka thylliej.
U Bah Mayral Born Syiem haba kren ha katei ka sngi kum u kongsan u la ai ka jingïaroh ïa ki nongthoh kot khasi kiba la kynmaw burom ïa ka lyngkhuh sngi ïap ba 84 jong u Myllung Soso Tham, u ba dei uwei na ki nongthoh kot ba paw ba ka ri Khasi ka la pynmih.
U la ong ruh ba katba nangmih ki sngi ngi la sdang ban klet ïa ki jong la jong ka lah ban dei ka riti ka dustur, ka riam ka beit bad ka ktien ka thylliej, hynrei ngi sngewkmen ba ka don kane ka seng ka long shisha kum ka stieh ban ïada ïa ka ktien ka thylliej, ka riti ka dustur.
U la ong ruh ba ha u snem 2005 la ithuh ïa ka ktien khasi kum ka Associate Official Language hynrei ka dang don ka jingïakhun haduh mynta ba ka ktien khasi ka dei ban rung ha ka khyrnit ba 8 jong ka riti synshar ka ri India, da kaba pynkynmaw ruh ba ha ka 28 tarik Nailur 2018 ha kaba la pass ïa ka resolution hapoh ka iing dorbar thawaiñ ban phah sha ka sorkar pdeng ban ïoh noh ka jingithuh, namar haba ngi peit ïa ki jingdonkam baroh ka ktien khasi ka la dei hok ban rung hapoh ka thup bad kum u nongmihkhmat un don ryngkat bad ka KAS ban nang ïai buddien ïa katei ka kam tad haduh ban da seisoh bad ba ka ktien khasi kan ïoh noh ka jingithuh na ka sorkar. Hadien katei ka jingïalang na ka liang ka Khasi Authors’ Society ka la pynlong ruh ka lympung ïamir jingmut halor ka phang ‘ka mynnor, ka mynta bad ka lashai ha ki poitri khasi’ bala wan ban shim bynta da ki riew shemphang bad ki khraw pyrkhat.