Rai u MDC ka Mynsngat-Khanduli Bah Dawan Lyngdoh ban ym ïakhun ïa ka Election MDC

Jowai, Nohprah 18: U MDC ka Mynsngat-Khanduli u Bah Dawan Lyngdoh u la ïathuh ba u la shim ïa ka rai ban ym ïakhun shuh ïa ka elekshon MDC sha ka Jaiñtia Hills Autonomous District Council (JHADC) ka ban long ha u bnai Rympang, 2025. Kane ka rai kaba ula shim ka long hadien ba ula dep ban pyrkhat sani bha halor ka jinglong jingman jong ka Election MDC namar kiba bun hi ki don ki jingeh kiba lah ban khanglad ïa u.
Kum u MDC uba la jop don burom ha ka snem 2019 na ka UDP, u pynpaw ka jingsngewnguh ïa ka party naduh ki nongïalam ba hakhmat eh kiba la ai tiket ïa u bad ula poi ha ka thong ka jingjop. Ha u snem 2023 ka UDP ka la ibit ban ai tiket ïa u na ka bynta ka election MLA watla um shym la poi sha ka thong hynrei ula kitbok kitrwaing ïa ka party ba kan dang kiew shaprang ban ïoh ïa u soh ka jingjop ha une u snem ban wan.
Kum u MDC ha ki 6 snem ula ïohi shibun ki jingeh hapoh ka Council khamtam ka jingduh tulop jong ki nongtrei, kumta ula leit pynïasoh shisnem sha ka BJP bad ban shong ha ka Liang Pyrshah na ka bynta ban wad lad ki lad ki lynti ban pynïoh tulop ïa ki nongtrei ka Council da kaba leit ïa kynduh ïa ki heh ka BJP ban ïoh pynsngew sha ka Sorkar Kmie, hynrei ha ka jingïaid lynti ki paralok MDC na ka seng Congress ki la ieh noh shiteng lynti ïa kane ka kynhun bad kane ka daw kaba la pynduh jingshañiah ïa u na ki nongkyrshan.
Ha ka jingïakren bad u nongthoh khubor ha ka sngi Baar, u Bah Dawan u la ai khublei ïa baroh kiba ïadon bynta bad u ha ka jinglong MDC kaba san snem bad sa shisnem na ka jingpynjlan ïa ka samoi treikam kaba hynriew bnai kata naduh ki bahaïing hasem bad ïa ki nongkyrshan na ka Constituency.
U la pynpaw ka jingkyrmen kaba skhem ha kane ka kynti ki don shibun ki kyrtong kiba dang samla kiba la mih shakhmat ban ïakhun ïa kane ka Election MDC 2025, da ka jingkyrmen ba kin trei shitom na ka bynta ka jingbha jingmiat bad ka roi ka par.
Ha ka juh ka por ula ai khublei ruh ïa ka VPP kaba la la mih pyrthei halor ka nongrim ban khot ïa ka paidbah ban leit thep Vote khlem da pyndonkam ïa ka pisa khnang ban ïoh ïa ka synshar khadar kaba khuid ba suba hapoh ka jylla, da kaba ai nuksa ïa ka jingjop ka VPP ha ka Election MP ba ladep.
Haba kyntu ïa ki paidbah nongshong shnong ba kin long kiba stad ban jied ïa ki nongmihkhmat, u Bah Dawan u la ong, “ban jop ïa ka jingeh jong ka Council donkam ban jied ïa ki nongïalam kiba stad, kiba shemphang bad kiba don ka jingkitkhlieh na ka bynta ka Ri bad ka jait bynriew.
Ha kajuh ka por um lah khlem da ka pynpaw ka jingsngewnguh ïa ki nongkyrshan kiba la pynjop MDC ïa u ha u snem 2019 bad u la panmap na ki paidbah nongkyrshan kum u MDC hapoh ka Constituency kiba don haduh 21 tylli ki shnong ki don shibun ki jingduna kiba um lah ban pynbiang ïa baroh, hynrei kat i bor ba rit ula pynshang ban pynïoh jingïarap kum ki Umbam umdih, ki Community Hall, ki ïing skul, ki paiñkhana bad kiwei kiwei de.
U la ong ka por ban ïaleh ka dang bun lada ka dawa ïa u, u lah ban mih biang shakhmat ha ki election ban wan, hynrei lada ka por kam dawa ka shong ha u ban leh ïa kaba donkam.
U Bah Dawan ula ai khublei Christmas bad Snem thymmai 2025 basuk bakmen ïa baroh ki nongshong shnong ha ryngkat ki jingkyrkhu kiba theh kyrhai ha ka jingim jong iwei pa iwei.