Sah sa ka jingïakhun Semi Final bad ka Final ban ïoh synshar, ong u Bah Ardent

Jowai, Nohprah, 18: Ka Voice of the People Party (VPP) ha ka sngi Baar ka la pynithuh paidbah ïa ki 29 ngut ki kyrtong ki ban ïakhun ïa ka Election MDC sha ka Jaiñtia Hills Autonomous District Council (JHADC) ka ban sa long ha u bnai Rymphang, 2025.
Ïa kane ka jingïalang pynithuh la pynlong ha Ïawmusiang naduh ka por 11: 30 baje mynstep ba la pynïaid da u Rijied Lamin.
Ha kane ka sngi la sakhi lang da ki nongïalam ba hakhmat jong ka party ba kynthup ïa u President ka party u Bah Ardent Miller Basaïawmoit, u Bah Brightstarwell Marbaniang, u Secretary jong ka State Election Committee u Dr. Londoner Sohtun, u Chairman jong ka State Election Committee & Vice President ka VPP u Dr. Kara Chen, ki nongkitkam ka party nalor kiwei de.
Ki nongkren ha kane ka sngi ki la pynsngew ïa ki nongrim treikam jong ka VPP, kata ban sam hok ïa ka skim sha u paidbah uba dei hok ban ïoh bad ka party ka ïeng halor ka nongrim ban ïada ïa ka hok jong ki trai ri trai muluk bad ban ai ka ‘jingsynshar hok bad ka bishar hok’.
U President ka VPP u Bah Ardent Miller Basaïawmoit haba kren ha ka jingïalang u la pynsngew shibun ki nongrim jong ka VPP bad ki rukom treikam kiba long katkum ki kyndon riti treikam. “Ha ka VPP ym don uno uno uba hakhlieh, lait na ka ‘Executive Committee’ kaba long ka bor ba hakhlieh duh,” ula ong.
U la kynthoh jur halor ka rukom treikam jong kane ka sorkar MDA-2.0 ba mynta hapoh ka jingïalam jong ka National Peoples Party (NPP) kaba la pynduh jingkyrmen ïa kiba bun balang naduh ka rukom thungkam thungjam, ka jingsynshar donbor kaba ktah ïa u paidbah baduk bakyrduh, ka jingduh tulop ki nongtrei sorkar bapher bapher, nalor ka jinghiar arsut jong ka jylla ha baroh ki liang bad ka jingdap ram.
U la kynthoh ruh halor ka jingkynrei ki kam sniew ba bun jait kiba kane ka sorkar mynta kam lah shuh ban tehlakam bad kine ki jingsniew ki la pynngop ïa ki khun samla shynrang bad kynthei ha ki jingdih pynbuaid kum ka kiad, drok, ki kam awria, ki jinglehkmen ba sniew bad kiwei de.
U la pynrem ruh halor ka jingdkoh treikam jong ka sorkar kaba peit tang ïa ka jingmyntoi jong ki katto katne ngut, “wat ïa ka jingriewspah jong ka mariang ha ki thaiñ East Jaiñtia Hills la pynjot pynpra bad die sha ki bar jylla ïa ka khyndew ka shyiap bad la ailad ruh ban pynïaid ïa ka khaïi ka pateng sha ki nongwei.
Ha ka juh ka por ula ong hashwa ba kine ki 29 ngut ki kyrtong ka VPP kin leit sha ki paidbah ki da hap ban rah lang ïa ki mat bad ki hukum jong ka seng. U la sneng bad kyntu ruh ïa ki 29 ngut ki kyrtong kiba ka seng ka la don jingkyrmen ba kin jop. Ka VPP ka don ka thong ban jop 70 na ka 100 (70%) ha kane ka Election MDC ha KHADC bad JHADC, la ong u bah Ardent.
Kum u President u la kyntu da ka mon sngewbha ïa ki paidbah nongshong shnong ka jylla ba kin pynjop donburom ïa ka VPP ha kane ka Election MDC kaba dei ka jingïakhun Semi Final hadien ba ka seng ka la jop ïa ka jingïakhun Quarter Final ha ka MP Election bad kaba sah ha ka ‘Final’ ka ban long ha u snem 2028 kaba dei ka Election MLA.
Hadien kane ka jingïalang ki paidbah ki la leit ban ai khublei markhmat ïa u President ka VPP, ïa ki nongïalam ka seng bad ïa ki 29 ngut ki kyrtong MDC sha ka JHADC.