Nongstoiñ, Nohprah, 18: Ka jingthmu ban pynkynriah noh ïa ka Rimuliang Block ophis na ka shnong Nonglang sha kiwei pat ki jaka, ka la pynbitar lep ïa ki paitbah jong katei ka shnong, namar naduh ba u Conrad Kongal Sangma Myntri Rangbah ka jylla u la dep ban wan buh ïa u maw nongrim bad plie ruh ïa ka ophis trei kam ba shipor, kaba la shu wai haïing ki briew ka la pynkmen ïa ki paitbah jong ka thaiñ muliang baroh kawei, hynrei mynta la mih sur sa kumwei.
Ha kaba ïadei bad ka jaka na ka bynta ban shna ïa ka ophis ba pura, ki la don ki nongshong shnong kiba la ai sngewbha ïa ka jaka kaba don harud ka surok bah, kaba heh kumba saw akar tam khlem da siew dor ei ei. Na ka liang ka sorkar lyngba ki bor district ka la dep phah ïa ki briew ba kin leit thew leit woh, ha kaba la lap ba katei ka jaka ka dei aba la bit la biang bha na ka bynta ban tei ïa ka Block ophis ba pura.
Kum ban pynkynmaw ba hadien katto katne bnai hadien ba la dep plie ïa katei ka Block ophis ba shipor, ki la don katto kane ngut ki rangbah napoh ka hima Jyrngam Sirdarship, kiba la lum ïa ka jingïalang paitbah ha ka shnong Tynghor ban dawa na ka sorkar, ba ïa ka Block ophis jong ka Rimuliang dei ban buh ha ka shnong Tynghor. La ïoh jingtip ba na ka sorkar ka la phah wad jaka ha katei ka shnong bad ki la don ki nongshong shnong kiba la ai ïa ka jaka kaba heh haduh khatlai akar bad ki briew jong ka sorkar ki la dep ban leit sorjamin.
Ha kaba ïadei bad ka jinghmu ban rah noh ïa ka Block ophis na ka shnong Nonglang sha Tynghor, u bah Ailand Lyngdoh u sordar jong ka shnong Nonglang u la ong ba na ka liang jong u ruh u la ïoh jingtip ba ka la don shisha ka jingthmu ban pynkynriah noh ïa katei ka Block ophis na katei ka shnong.
Hadien kata u la pyntip sha ki nongshong shnong bad pan jingmut la ki shah ne em ban rah noh ïa katei ka Block ophis hawei pat bad na ka liang ki paitbah mar shu tip ïa kata ki la bitar lep bad ki la byrthen da kaba tyngeh, ba lada ka sorkar ka shu wan pynbiej kai ïa ki paitbah kim banse ban ïaid da kawei pat ka lynti kam pher wat lada kan poi shaduh u pud ban pynlong da ki jingïakhih pyrshah, lane ban leit tied jingkhang sha ka ïingbishar jong ka jylla, namar ba ïa u maw nongrim la wan sieh ha ka shnong Nonglang.
Nalor kata la dep plie ruh ïa ka ophis ba shipor bad ïa ka jaka ban tei ïa ka ophis ba pura ruh la dep ai bad ki briew jong ka sorkar ki la dep thew dep woh sa kaei pat ka bym pat biang.
U sordar jong ka shnong Nonglang u la ong ba lada katei ka jaka ïa kaba la ai sngewbha sha ka sorkar ban tei ïa ka Block ophis kam pat biang, ka sorkar ka dei ban da kren shai namar ki trai ki long kiba la kloi ban ai sngewbha biang sa saw shah ka khyndew ha katei kajuh ka jaka lada kam pat biang. Nalor kata u la ong ba ka sorkar ka dei ban pynshai halor katei ka jingthmu bad kam dei ban ïalehkai ïa ka hok jong u paitbah.
