Jowai, Nohprah, 18: Ka Synjuk ki Dorbar Shnong Shangpung ha ka sngi Balang ka la rakhe ïa ka lyngkhuh sngi ïap kaba 84 jong u Myllung Soso Tham ha Shangpung Mission, West Jaiñtia Hills District.
Ïa ka jingïalang ha kane ka sngi la pynïaid da u Bah Emmitre Ïa kai Asst. Professor, Shangpung College, la ïoh ruh ka jingkren lyngkot shapang ka Synjuk ki Dorbar Shnong Shangpung na u Nidayoo Papang, President ka seng. Ïa ka jingkren lyngkot shaphang ka Shangpung College la ïoh na u Rev. G.S Lytan, Adviser ka SDSS bad na u Dr. D.G. Lyngdoh Principal Shangpung College.
La ïoh ïa ka jingkren shaphang u Soso Tham na u Dr. Davidson Diengdoh Asst. Professesor Post Graduate Khasi Dept. Jaiñtia Eastern College, East Jaiñtia.
Ha kaba la pynkynmaw ïa ka jingim jong u Myllung Soso Tham, ha kaba la ïathuh ba ïa u Myllung Soso Tham la kha ha u snem 1873 ha ka longïing jong u Hat Tongper na ka shnong Sohkha bad ka Lynkei Tham na Sohra, ki la don 4 ngut shipara. Ïa u Soso Tham la khot ruh ïa u kum u Nonghikai ha ka jaitbynriew bad ka thoh ka tar, ïa ki kot kiba ula thoh la pyndonkam ha ki kyrdan pule bapher bapher jong ki skul bad College.
U Soso Tham ula ïapoi kha bad i kong Kerila Dora Gatphoh bad don 5 ngut ki khun. Hadien ka jingkhlad jong i kong Kerila u Soso Tham ula ïapoikha noh bad i kong Rosamon Giri Nongrum bad um don khun hangne.
Ha ka snem 1894 ka mission ka la phah ïa u Soso Tham ban wan hikai noh ha Shangpung bad ruh shipor ha Mookaïaw. U la shongthait na ka kam hikai ha ka 30 tarik u June 1931 bad ula khlad noh na kane ka pyrthei ha ka 18 tarik u December 1940, ha kaba la tep donburom ïa u ha u lum jingtep ka Balang All Saint’s Church, Shillong, Rhino Point. La pynphuh pynphieng shuh shuh ïa kane ka prokram da ka jingrwai bad jingshad na ki khynnah skul bapher kynthup na ka Clearwater Secondary School Shangpung, ka Shangpung Presbyterian HSS, Shangpung, ka Lummuroo Secondary School, Shangpung bad na ki samla pule ka Shangpung College. Ïa ki kyntien ai khublei la ïoh na u R.H Wann Secretary ka Synjuk ki Dorbar Shnong Shangpung.
