Shillong, Risaw 16: Ki shipai Border Security Force (BSF) kiba la peitngor bha bad kiba la pahara ha shilynter jong ka khappud hapdeng ka India bad Bangladesh kaba ha East Khasi Hills district Meghalaya, ki la ïoh bat ïa uwei u nong Bangladesh uba dei u nongkhaïi beaiñ uba donkti ban shalan tuh ïa ka shini sha ri Bangladesh.
Ha ka jingïaid pahara, ki shipai kiba la peitngor bha jong ka 4th Battalion BSF ki la ïohi ïa ka jingdon kiba ïaid hajan khappud ha kaba ki la ïohi ruh ba dei ki nong Bangladesh kiba ju khaïi beaiñ kiba dang kit ïa kane ka shini. Hadien ba ki la shah kthong, ki shipai BSF ki la ïoh ban kem ïa uwei u nongkhaïi uba kyrteng u Md. Hussain Ahmad, uba shong ba sah ha Sylhet District, Bangladesh.
Na ka liang ki shipai ki la ïoh ruh ban kurup na u ïa ki byrni ba la thep da ka shini, katba kiwei pat ki la ïoh lad ban phet krad, da kaba shim kabu na ka jingrben ka khlaw bad ka jinglong thiep jong ka jaka. Ïa utei uba la shah kem ha ryngkat lang bad ki tiar ba la ïoh ban kurup la aiti noh sha ki pulit ka Pynursla na ka bynta ban pyndep ïa ki kam katkum ki kyndon jong ka aiñ.
