Ka aïom thung dieng ka la dei aiu ki paidbah kin leh ban pynbhabriew pat ïa ka mariang

Nongstoiñ, Jymmang 31: Sa tang katto katne sngi ka pyrthei shityllup kan sa rakhe ïa ka sngi ba kyrpang kaba la tip kum ka World Environment Day lane ka sngi ban pynneh pynsah ïa ka mariang ha kaba ka jylla jong ngi ruh ka ju leh man la u snem.
Haba phai ha ka jingrakhe ïa katei ka sngi ba kyrpang ha kine ki snem ba la leit noh, la lap ba ym dei tang ka sorkar kaba pynlong ïa ka jingrakhe ba kyrpang ïa katei ka sngi. Hynrei wat ka Khasi Jaiñia Presbyterian Synod Sepngi, ka la pynbeit ïa kawei ka sngi u Blei kaba kyrpang ha ka taïew ba nyngkong jong u bnai Jylliew man la u snem, ba ki Balang hapoh ka KJP Synod Sepngi kin pynlong ïa ka jingrakhe ïa katei ka sngi.
Haba phai ha ki snem ba la dep ki don katto katne ki Balang kiba hap hapoh ka KJP Synod Sepngi, kiba pynlong ïa ki social work ha ka sngi saitjaiñ ha kaba ki dkhot ka Balang ki ïa mih paitbah ban thung dieng ha ki jaka kiba I donkam. Nalor kata ha ka sngi u Blei pat ha ka por ba pynlong jingïaseng, ki ju buh ïa ki subject kiba kyrpang kiba ïadei beit shaphang ka mariang. Nalor kata ha ki snem ba la dep ki skul bad ki ophis sorkar man la ka san tarik u bnai Jylliew, ki ju pynlong ïa ki prokram ba kyrpang kum ki prokram thung dieng, ki jingpynshai paitbah ïa ka jingkordor jong ka mariang, ki khlaw ki btap bad ki jingdon jingem kiba ker sawdong.
Haba phai ha katei ka bynta, naduh u snem ba la dep bad mynta u snem namar ka jinglynshop jong ka khlam covid 19 ,ym shym la lah ban pynlong ïa kino kino ki prokram kiba kyrpang kum ki jingpynshai paitbah bad ki prokram ban thung dieng. Nalor kata ki bor sorkar ki la ju pynkynmaw ban kyntu ruh ïa ki paitbah nongshong shnong, ba ha kaba kum katei ka sngi ba kyrpang, la kumno kumno uwei u nongshong shnong u dei ban shim ka jingkitkhlieh lem, ban pynneh pynsah ïa ki dieng ki siej bad pynjyrngam ïa ka mariang, da kaba thung uwei ne ar tylli ki tynrai dieng, hynrei ym ju kham don satia kiba sngap ban leh ïa kata.
Mynta u snem wat la ka jinglynshop jong kane ka khlam covid 19 ka dang ïai bteng ruh, hynrei ha shuwa ban ïakynduh ïa katei ka sngi, ki don katto katne ki jingkyrpad bad ai jingmut da ki riew rangbah sha ki para nongshong shnong jong ka jylla bad ka West Khasi Hills District baroh kawei, ba lada long kaba lah kin pyrshang ban wad tynrai dieng bad pyrshang ban thung la ka long ha kano kano ka jaka kat kaba lait bad kaba ibit ban thung khmtzm eh ha ki rud surok, ki jaka bym don ïing briew bad lada pyrshang ban leh kumne kan wanrah biang ïa ka jingjyrngam sa shisien pat.