Mairang, Jymmang 30: U Secretary ka UDP Nongkhlaw Unit, Mairang Constituency, u Bah TKS Thabah, ula pyntip ba u la mih noh na ka UDP ban leit iatreilang noh bad ka Seng Voice of the People Party (VPP) hapoh ka jingialam u Rev. Shanlang Warjri, uban long u kyrtong na Mairang ha ka elekshon MLA 2023.
Ha ka shithi ba u la phah sha u Secretary ka UDP Nongkhlaw Zone, u Bah Thabah, uba la pyndep ruh ia ka jingpule Theolgy, u la ong ba um don jingpyrshah eiei kaba pyrshah ia u Bah Metbah Lyngdoh, MLA ka UDP na Mairang ne ia ka Seng UDP, hynrei ka jingleit pyniasoh sha ka VPP namar ba u iohi ia ka jingtbit jong u Rev. Shanlang kum u nongialam. “Kum u Samla ba la pyndep ia ka Theology, ngam lah ban kyntait ia i Pastor Shanlang, namar nga iohi ia ka mynsiem shakri jong i ia ki paidbah bad khamtam eh ia ka vision jong i kaba don jingkyrmen ia ngi ki samla”, la ong u Bah Thabah.
Shuh shuh u la ong ruh ba kum uwei u Samla pule uba la ju trei ban saindur ia ka imlang sahlang, u la angnud la slem ban mih ki nongialam kiba iohi jngai kum u Pastor Shanlang uba don ruh ka jingkitkhlieh na ka bynta kiba duk kiba rangli bad kumjuh ruh na ka bynta ki samla. “Kadei ka khep kaba kmen ia nga ban mih ki nongialam kum u Rev. Shanlang”, la ong u Bah Thabah.
Lah ban kdew hangne ba u Rev. Shanlang Wajri, uba la iehnih ia ka jinglong Pastor, u la pyniasoh sha ka VPP ban iakhun ia kane ka elekshon MLA ha u snem 2023 pyrshah sha u hehduh ka UDP, u Bah Metbah Lyngdoh. U Rev. Shanlang, udei nongseng ia ka Mairang Youth For Change (MYFC) ka Sengbhalang kaba la trei bun ki kam na ka bynta ki paidbah ba da imlang sahlang ha thain Mairang.
