13 ngut ïoh jingmyntoi ki khynnah Meghalaya na ka skhim PM CARES for Children

Shillong, Jymmang 30 : U Myntri Rangbah duh ka ri, u Narendra Modi u la pyllait paidbah ïa ka skhim PM CARES for Children mynta ka sngi lyngba ka video conference. Ka Myntri sorkar pdeng, ka Smriti Irani, kiwei kiwei ki dkhot jong ka Kynhun Myntri, bad ki Myntri Rangbah ki la ïadonlang ha kane ka jingïalang. Ki don haduh 13 ngut ki khynnah na kane ka jylla kiba la shah ieh khunswet na ka jingduh noh ïa ki kmie ki kpa kiba ïoh ïa kane ka skhim.
Ha ka jingai jingkren ha ka jingïalang, u Myntri Rangbah duh u la pynpaw ka jingsngewlem ïa ki jingeh ha ka jingim jong kito ki khynnah kiba la duh ïa la kiba ieit ba thoiñ namar ka Corona. “Ka jingïakhun kaba man ka sngi, ki jingeh kiba man ka sngi. Ka long kaba eh ban buh ha ki kyntien ïa ka jingpangnud jong ki khynnah kiba donlang bad ngi mynta ka sngi, ïa kaba la pynlong ïa kane ka prokram,” la ong u Myntri Rangbah duh jong ka ri . U la ong ïa ki khynnah ba ïadon lang ha kane ka sngi ba u kren kum u dkhot jong ka longïing, ym kum u Myntri Rangbah duh.
Ha kum kane ka jinglong jingman, u Myntri Rangbah duh u la ong “Ka PM CARES for Children kadei ka jingpyrshang kaba rit eh ban pynduna ïa ki jingeh jong ki khynnah ba shah ktah ha ka Corona kiba la duh ïa la ki kmie ki kpa jong ki. Ka PM CARES for Children kadei kaba pyni ba man u nongshong shnong jong ka ri ki don bad phi.” U Myntri Rangbah duh u la pyntip ba lada don kiba donkam ban shim ram na ka bynta ka pule puthi, ka PM CARES kan ïarap ha kata ruh. Na ka bynta kiwei kiwei ki jingdonkam ba man ka sngi, la buh ruh 4 hajar tyngka man ka bnai na ka bynta jong ki lyngba kiwei kiwei ki skhim. Nalor ka T. 10 lak ynda ki la kot sha ka 23 snem ka rta ki khynnah kin ïoh ïa ka health coverage lyngba ka Ayushman card kaba lah ban ioh jingsumar sha ka 5 lak tyngka bad ka jingiasyllok lyngba ka samvad helpline na ka bynta ka jingai jingïarap ïa ki jingkulmar khlieh lane ki jingpangnud.
Ki khatlai ngut ki khynnah na Meghalaya ki ban ïoh ïa ki jingmyntoi hapoh ka skhim na kane ka jylla ki long (East Khasi Hills-4, West Khasi Hills-2, West Jaintia Hills-2, East Jaintia Hills-3 bad Ribhoi-2).
U Assistant Director (CNCP), Tnat Social Welfare, East Khasi Hills, Lulu Lyngdoh u la ong ba ka skhim PM CARES for children kadei na ka bynta kito kiba la duh ïa la ki kmie kpa ha ka COVID-19. U la ong ba u District Child Protection Officer, ryngkat bad ka tnat ka koit ka khiah, ka la ïarap ban ithuh ïa ki khynnah.
Ka District Child Protection Officer, Jowai ruh ka la pyntip ba ki arngut ki khynnah ki dei na West Jaintia Hills District bad ma ki, ryngkat bad kiba haïing jong ki bad ka Additional Deputy Commissioner, Jowai, Kong R.D Kynjing, District Child Protection Officer, District Child Protection Unit, Jowai ki la ïadonlang ha kane ka jingïalang ba pynlong lyngba ka bor internet.
U Myntri Rangbah duh u la ai jingïaroh ïa ki khynnah kiba mad ka jingeh na ka khlam bad ong ba ym lah da lei lei ban siew bailutksan ïa ka jingieit jong ki kmie ki kpa. “Ka Maa Bharati ka don lang bad phi baroh ki khynnah ha kane ka por jong ka jingeh.” Ka ri ka pyrshang ban pynbiang ia ka jingkitkhlieh jong ka lyngba ka PM CARES for Children, u la ong.
U Myntri Rangbah duh u la kynmaw ïa ki jingjia jong ka jingdon ka jingsngewlem parabriew ha ka por jong ka khlam, khamtam kumno ki briew ki nohsynniang sha ka bha ka miat jong ki briew kiba shah ktah. U Myntri Rangbah duh u la ong ba kane ka fund ka ïarap shibun ha ka jingpynkhreh ïa ki hospital, ka jingthied ïa ki ventilator bad ka jingplie ïa ki jaka pynmih oxygen ha ka por jong ka Corona. Namar kane la lah ban ïada bun ki jingim, bad ïada ïa ka lawei jong ki bun ki longïing.
U Myntri Rangbah duh u la ong wat ha ka jinglong jingman kaba kah dum, lada ngi don ka jingngeit halade, kumta ka jingkyrmen ka don. U la ong ka ri jong ngi hi kadei ka nuksa kaba khraw halor kane. U Myntri Rangbah duh u la ai jingmut ïa ki khynnah ban nym ailad ïa ka jingeh kan kylla sha ka jingshah pynrem. U la bthah ïa ki ban sngap ïa kiba la heh la san bad ïa ki nonghikai jong ki. U la ong ruh ba ha kine ki por kiba eh ki kot ki lah ban long ki paralok ba shaniah jong ki. U la bthah ruh ïa ki ban ïaleh ban long kiba lait na ka jingpang bad ban ïashim bynta ha ka Khelo India bad ka Fit India Movement. U la bthah ruh ïa ki ban ïashim bynta ha ka Yoga day ruh. U la ong ba ha kata ka jinglong jingman jong ka jingduh mynsiem, ka India ka shaniah ha la ka jong ka bor. “Ngi shaniah ïa ki scientist jong ngi, ki doctor jong ngi bad ki samla jong ngi. Bad, ngi la kylla sha ka nuksa ym ka jingkhuslai na ka bynta ka pyrthei. Ngim shym la long ka jingeh hynrei ngi long kum ki nongplie lad. Ngi phah ki dawai, bad ki dawai tika sha ki ri kylleng ka pyrthei. Wat kum kane ka ri kaba heh, ngi pynpoi ïa ki dawai tika sha man ki nongshong shnong,” u la ong. Ka ri jong ngi ka ïaid shaphrang kum kaba kiew sted ha ka ïoh ka kot bad ka pyrthei ka phaikhmat sha ngi da ka jingkyrmen bad ka jingshaniah kaba thymmai, u la bynrap.
U Myntri Rangbah duh u la ong ba ki kyrdan ba ka India ka la poi ha kine ki phra snem ba la leit, ym ju don ba lah ban poi pyrkhat mynshuwa. Mynta, ka burom jong ka India ka la kiew ha kylleng ka pyrthei, ka bor jong ka ri jong ngi ka la kiew ha ki rynsan ha kylleng ka pyrthei. U la pynpaw ka jingkmen ba ka bor jong ki samla ka ïalam ïa kane ka jingïaid lynti jong ka ri. “Aiti ïa la ka jingim sha ki jingangnud jong phi, bad khlem pep, ki jingthrang jong phi kin sa urlong,” la pynkut u Myntri Rangbah duh.