Shillong, Jymmang 30 : Lada jia ba wan ka jingsynshar jong u President ha kane ka jylla Meghalaya kan buh ïa ka jylla ha ka jingma kaba khraw namar bun ki mat jingdawa kin sahteng lut namar u Lat u lah ban shim rai marwei halor kino kino ki kam namar ka jingsynshar kan long hapoh ka jingpeit bad jingpynïaid jongu, ong u MLA ka Mawlai Constituency u bah P.T Sawkmie.
Haba ïakren bad u nongthoh khubor u bah Sawkmie u la ong kumba ka paw bad long ki don ki Seng Saiñ Pyrthei ha kane ka jylla kiba kwah da shisha ban wanrah ïa ka jingsynshar President ne President’s Rule hapoh ka jylla. “ Lada ka President’s Rule ka wan ka jingma kaba khraw ka ap ïa ka jylla ha kum kane ka por namar ïa ka Railway Head lah ban wanrah jubor haduh Byrnihat, ïa ka jingdawa ILP lah ban pynsahteng, ïaka Them Metor ruh lah ban pynsangeh noh ban pynkynriah nalor kata wat kane ka kam ïa pynbeit pud pynbeit sam ruh ka lah ban sangeh noh” ong u bah P.T Sawkmie.
Nalor kata wat ka Election MLA kaba dei ban long ha u Rymphang ruh lah ban pynjlan noh shuh shuh bad kine kiei kiei baroh kin ktah bha ïa ka jylla namar dei ban kynmaw haba wan ka jingsynshar President lah ban wanrah ki jingpynkylla haki aiñ ki kanun katba mon kumba la jia ha Jammu bad Kashmir ruh. Une u Lat ba mynta jong ka jylla u dei u Lat uba la synshar ïa ka Jammu bad Kashmir ha ka por ba wan ki jingpynkylla ha katei ka jylla. Kumta dei kine kiei kiei baroh kiba ki seng saiñ pyrthei ki hap ban peit jngai na ka bynta ka bha ka miat ka jylla bad ïatrei lang ban lait na ka jinsynshar President haka jylla, pynkut u bah Sawkmie.
