Nongstoiñ, Jymmang 30: Ka PM Cares for Children Scheme, ka dei ka jingïarap kaba kyrpang da ka song pisa kaba la pyntreikam da u Myntri Rangbah duh ka ri, na ka bynta ban ai jingïarap ïa kito ki khynnah kiba hapoh khatphra snem, kiba la duh noh ïa ki kmie ki kpa na ka daw ba ki ngat ha ka jingpang khlam Covid 19.
Ki khynnah kiba dei ban ïoh ïa katei ka jingïarap, ki dei tang kito kiba la duh noh ïa u kpa bad ka kmie, hynrei kito kiba duh tang ïa u kpa ne tang ïa ka kmie kin ym lah ban ïoh. Katei ka jingïarap kan long haduh ba kito kiba ïoh kin da dap arphew lai snem ka karta. Nalor kata ïa katei ka skhim yn pyntreikam lyngba ki Ophis jong ki Child Protection Development Officer, ha ryngkat ka jingïatrei lang bad ki bor pynïaid District jong ki jylla hapoh ka ri.
Ha kaba ïadei bad ka jingpyntrei kam ïa katei ka shim ha West Khasi Hills, u Bah P.D Sangma Deputy Commissioner u la pyllait mynta ka sngi ha ka jingïalang kaba lyngkot kaba la pynlong ha Conference hall jong ka ophis jong u. Ha kane ka sngi ba la pyllait ïa katei ka skhim, la ïadon ryngkat da u ban W.Shabong District Child Protection Officer, bah M.Diengdoh ADM, ki kynthei kiba dei ki nongtrei kiba peit ïa katei ka bynta
La pynïaid ïa ka jingïalang da u bah P.D.Sangma, ha kaba u la ai ruh ka jingpynshai ha kaba ïadei bad ka jingpyntrei kam ïa katei ka skhim. Ha kajuh ka por la ïoh ruh ïa ka jingbatai ba kham bniah na u bah W.Shabong CDPO. Haba pynshai ha kaba ïadei bad ki khynnah kiba ïoh ïa katei ka jingiarap, ki don tang ar ngut kiba dei na West Khasi Hills. Hynrei naduh ba la pynkha sa kawei pat ka District ka shnong jong ki ka la hap noh ha Eastern West Khasi Hills. Hadien katei ka jingïalang, u Deputy Commissioner u la aiti ïa ki kot kiba donkam ha u nongpeit nongsumar ïa kitei ki khynnah.
