Jowai, Jymmang 30: Ka kong Linda Nongkrem ryngkat bad kiba haïing ha sem mynta ka sngi kila wan ban pynshai ïa ka jingeh kiba ïa kynduh na ka leh donbor jong u Waheh Shnong ka Lumtrep Nongjngi, West Jaiñtia Hills District u ma Ebormi Pale, ha kaba ïadei bad ka jingbym ïoh khaw rashon kaba la san bnai jong kine ki saw tylli ki longïing.
Ka kong Linda haba kren ha u Mawphor kala pynsngew ïa ki kam kiba utei u Waheh Shnong ula leh pyrshah ïa ki longïing jong ka halor ka hok kaba dei hok ban ïoh na u khaw rashon bad ka jingbyrngem kyntait shnong u Waheh Shnong kiba ula pynmih ïa kitei ki kyntien ha ka por ba ki dang mut ban leit soi ïa ka Job Card hakhmat utei u Waheh Shnong.
Kala pyntip ba kane ka jingduh khaw rashon ba san bnai kala dep ban ujor sha ka Vigilance Committee jong ka shnong, hynrei kim shem la lum satia ïa ka Committee. Kumta kala ujor noh sha u Secretary Shnong ha kaba u Secretary ula leit rah ïa ka jingujor sha ka EC Shnong, kala ong wat tang uwei ruh u dkhot EC ym shem la don ba pdiang ïa kane namar ïa kane ka kam la leh bor beit da u Waheh Shnong wat ïa u Dealer nongsam khaw ruh um shem la don ha katei ka Dorbar ha ka jingshisha ka kong Linda ka la ong ba ym dei satia ban pynlong ïa ka Committee.
Kala kynthoh ruh ba ïa ka kam Dealer ha ka shnong la pynïaid beit da u Waheh Shnong da kaba shu ai kyrteng ha u Dealer u Pynïaidame Pale.
“Ha ka por ba nga mut ban leit shim khaw rashon ka dor u khaw ka long T.4 tangka shi kilo bad ïa kane ka dor ym shem la rai satia ha ka shnong namar katum ka order ka sorkar ka dei ban sam ha ka dor T.3 tyngka shi kilo bad san kilo shi khlieh”.
Shuh shuh kala mih ruh ka jingkren na u Waheh Shnong ba kino kino kiba kwah ban shim khaw ha ka dor T. 4 tyngka ki lah ban wan shim ïa u khaw rashon, hynrei ïa kito kiba pyrshah ki lah ban leit phai noh. Halor kane ka kong Linda ka buh ka jingkyntu ïa ki bor sorkar ba kin shim khia ïa kane la ka long ne em ïa u Waheh Shnong ban leh donbor kumne.
Ka kong Linda kala kynthoh jur halor ka jingkhot jingïalang jong u Waheh Shnong ban pynkiew ïa katei ka dor bai khaw khlem da ai jingtip sa baroh ki nongshong shnong kiba dei ki nongbam rashon.
Katkum ka jingïathuh ka kong Linda haka por ba ïakhun ïa ka kam die rashon ka kong Linda ruh kala ïaleh ïa ka Election, hynrei utei u Waheh Shnong ula shim kabu ban pyndonkam da ki briew ki bym shem la don kyrteng Vote hapoh ka shnong.
Shuh shuh kala kynthoh ïa ka jingpynshai utei u Waheh Shnong ula shim ruh ha ka kyrteng ka seng kynthei namar ïa kane ka seng u Waheh Shnong ula dep ban phah surrender ïa ka haka por ba ki dang don ka Committee ka seng kynthei, ha kaba u la pynmih ïa kine ki kyntien “Phi ki seng khynthei ki bym pat dep Rejister ïa ka seng jong phi, phim shem la lah shuh ban pyntreikam ïa ka seng kynthei jong phi” bad ha kata ka por baroh ki para seng kynthei kila lyngngoh ïa kane ka kyntien ba mih na u Waheh Shnong.
Kala ïathuh ba ïa seng kynthei ka shnong la seng naduh u snem 1998 bad la don haduh ar ngut ki Waheh Shnong kiba la leit shadien bad kitei ki Waheh Shnong kim shem la pynthuh ïa ki kam ka seng khynthei, hynrei ynda la poi ha une u Waheh Shnong ba mynta, ula ong ba ula ïoh ïa ka sannad na ka District Council ba u don ka bor ban leh katba mon.
Kumta ka la buh jingkylli hato ka District Council ka don mo ka bor kaba la ai ha u ban pynsangeh ïa ka seng kynthei khlem da lap ïa ka jingleh bakla jong ka seng, kumta ka la dawa na une u Waheh Shnong ba un pynshai ïa kane namar ha kata ka por ka kong Linda ka dang long kum ka Secretary.
Sa kawei kala ong ba utei u Waheh Shnong ula dep pynshai ba na ka daw ka jingduk palat jong ka shnong la hap ban kyntiew ïa ka bai khaw rashon sha ka T.4 tyngka na ka daw bym don kiba treh ban die T.3 tyngka, hynrei ynda la wan mih ki bor sorkar la pynbna lada don kino kino kiba nud ban die T.3 tyngkat yn pynkheiñ noh ïa une u Dealer ba die ha ka dor T.4 tyngka.
Hamar kata ka por ka kong Linda kala ïeng bad tyrwa ba dei maka ba nud ban shim ban die ïa u khaw ha ka dor T.3 tyngka, hynrei haduh mynta ym shem la don kino kino ki bor ba nud ban pynkheiñ ïa utei u dealer la pynsngew shuh shuh ka kong Linda.
Kala ong ba ka sorkar kala dei ban shim khia mardor ïa kane khnang ban lait na kino kino ki jingeh bad kum ki nongshong shnong ki don ka hok ban pynsngew ïa ka jingeh khnang ba ïa kane ka kam ym dei satia ban lehkai da mano re mano.
Kala ïathuh ba utei u Waheh Shnong ula rai ban ai ïa ka ‘Job Card’ sha ki nongshong shnong lada ki kohnguh bad ka jingpynbeit jong u kata ban thep pisa haduh 3 hajar bad kitei ki nongbat Job Card kin hap leit ai tang 1500 tyngka sha u.
Wat tang ka pisa kaba la dep pynphai da ki Job Card ha ka 28.04.2022 ïa kala la pule da u Secretary Shnong kaba la tam T.3 lak (tyngka) hynrei katei ka pisa kam shem la paw ha ka Audit Report jong ka shnong ong ka kong Linda bad buh jingkylli shano kata ka pisa ka don bad kala dawa na u Waheh Shong ba u dei ban pynshai ïa kane.
