Shillong, Jymmang 30: Ka Mawjatap Sports and Cultural Club ha ka 21 tarik Jymmang ka la pynhap pyrda noh ïa ka lympung ïalehkai Green Hills Football Tournament 2022. Ïa kane ka lympung la wan ban pynhap pyrda da u Bah Kansing Lyngshiang uba dei u kyrtong ka Congress ha ka ilekshon MLA 2023 na Mawkynrew Constituency kum u kongsan ha ka jingïadonlang u Bahh Teibor Shadap kum u symbud kongsan.
Ka Siangkhnai SC ka la ïoh rah ïa ka nam lahduh jong kane ka lympung da kaba pynliem da ka tie-breaker da 5-3 kol pyrshah ïa ka Umsawwar SC.
U Bah Kansing Lyngshiang haba krem kum u kongsan u la ai khublei bad ïaroh ïa ka Mawjatap S&CC kaba la pynlong ïa kane ka tournament ban kyntiew ïa ki samla bad ïa ka kam ïalehkai football ha ka thaiñ hi baroh kawei. U la ai khublei ïa ka kynhun ba rah nam lahduh bad ruh ïa baroh ki kynhun kiba la wan ban ïashim bynta ha kane ka tournament watla kim poi sha ka thong hynrei ba kin nang trei shitom ban don ka mynsiem ïakhun khnang ba ha kawei ka sngi kin sa ïoh ïa ka jingjop.
