Pyrshah ïa u Myntri Sorkar yn aireng u Bah Kansing Lynshiang na Mawkynrew Constituency

Shillong, Jymmang, 29: Ka Mawkynrew Block Congress Committee (MBCC) ha ka sngi Saitjaiñ ka la pynbna ïa ka kyrteng jong u Bah Kansing Lyngshiang kum u kyrtong ban aireng ha ka Elekshon sha ka Ingdorbar Thawaiñ ka Jylla ka ban sa long ha u snem 2023.
Ka Mawkynrew Constituency ïa mynta la mihkhmat da u Bah Banteidor Lyngdoh uba dei ruh u Myntri ka Sorkar Jylla bad u President jong ka People’s Democratic Party (PDF).
Ha ka jingpynbna ïa ka kyrteng jong u Bah Kansing Lynshiang, la sakhi lang da u President jong ka Meghalaya Pradesh Congress Committee (MPCC) u Bah Vincent H. Pala, u Working President u Bah P. N Syiem, ki Rangbah Shnong jong ki shnong bapher bapher, ki dkhot ka Mahila Congress na Mawkynrew bad ki nongshong shnong kiba la wan ïashim bynta na ki shnong bapher bapher ka Mawkynrew Constituency.
U Bah Vincent Pala haba kren ha kane ka jingïalang u la ong ba u Bah Kansing Lyngshiang naduh ba u dang khynnah u la don ka jingangnud ban shakri ïa ki paidbah bad la jan ar phew snem kynthih u la aiti ïalade ha ki kam shakri paidbah na ka bynta ka bha ka miat jong ki nongshong shnong ka thaiñ Mawkynrew.
“Ka elekshon ka ban sa long ha u snem 2023 kan long hapdeng kiba riewspah bad kiba duk ha kaba bun ki dei tang ki nongrep bad ki paidbah ki dei ban jied ïa u Bah Lynshiang kum u nongmihkhmat u ban sa wan namarba u dei uba ju ieng barabor ban kren ïa ka khia ka shon jong ki paidbah,” ong u Bah Pala
U Bah Pala u la ong ba 95% na ki paidbah jong ka shnong Mawkynrew Constituency ki dei ki nongrep bad namarkata ka Constituency ka donkam ïa u nongïalam uba dei hi u trai shnong jong ka thaiñ bad uba tip bha ïa ka jingeh jong ki nongrep.
U Bah P. N Syiem haba kren ha kane ka sngi u la ong ba ki paidbah jong ka Mawkynrew Constituency ki dei kiba donbok haduh katta katta ban ïoh ïa u kyrtong uba dang samla bad uba dei ruh u trai shnong bad uba ki paidbah ki tip bad ki ithuh lut ïa hapoh ka Constituency baroh kawei.
“Wat ki briew kiba nabar jong ka Constituency khamtam ki nongrep ki tip bha ïa ka jinglong jong u Bah Kansing Lyngshiang khamtam nalor ba u dei u nongtrei mon sngewbha uba la trei shitom bha haba ka jylla ka la shah lynshop ha ka jingpang khlam COVID-19 bad uba la kloi ban ai jingïarap da kaba sei pisa na pla sha ki briew kiba la shah ktah ha kane ka khlam,” ong u Bah Pynshngaiñ.
U Bah Pynshngaiñ u la ong ba ka por ka la ih ba ki paidbah jong ka Mawkynrew Constitunecy kin jied ïa u nongïalam uba dei u trai shnong jong kane ka Constituency bad uba tip kham bha ïa ka jingeh jong ki paidbah khnang ba un dup lah ban ban ïarap kham bha haba ki paidbah ki ïakynduh ïa kino kino ki jingeh.
“Manla uwei pa uwei u tip, ha ka por ba dang lynshop ka jingpang khlam COVID-19, u Bah Kansing u dei u nongïada bad u nongïarap ïa ki paidbah hapoh ka Constituency khamtam ïa ki nongrep. Dei ma u, uba ïarap ïa ki nongrep ban pynïaid iew ïa ki mar rep ha kato ka por. Dei ma u, uba mih shakhmat ban ai jingïarap ïa kito ki longing kiba ïakynduh jingeh bad kiba hap ban set slung ïalade ha kato ka por,” u la bynrap.
U la ong shuh shuh ba ka jingmih madan jong ki samla ban ïakhun na ka tiket jong ka seng Congress ka kdew shai ba ki nongshong shnong khamtam ki nongrep, ki samla bad ki longkmie jong ka jylla ki dang don ka jingshahniah ha ka party.
U Bah Kansing uba la shah pynbna kum u kyrtong, u la ongba ha kine ki ar phew snem ba la leit noh u la trei mon sngewbha ban shakri ïa ki paidbah bad ïa ki nongïalam jong ki seng saiñpyrthei bad mynta ka por ka la ih ba u dei ban ïakhun hi ïa ka elekshon khnang ba un dup lah ban shakri kham bha ïa ki paidbah hapoh ka Constituency baroh kawei.
“Ngan ym lah shuh ban kren ïa ka jingeh kaba ki paidbah jong ka Constituency ki la mad ha ka jingwan lynshop ka khlam jingpang. Nga sngew ba ka dei ka jingkitkhlieh jong nga ban pynthikna ba ki paidbah kin ïoh ïa ki lad jingïararp bad ban ym mad ïa kum kine ki jingeh,” u la ong.
U la ong ba kum u nongshong shnong jong ka Constituency, un ym lah ban kular ïa ki paidbah ïa kaba um lah ban leh hynrei ka dei pat ka kamram jong u ban peit bad ban khmih ba manla uwei pa uwei hapoh ka Constituency kin ïoh jingmyntoi.
“Nga ai khublei ïa ki nongïalam jong ka MPCC kiba la ibit ïa nga ban ïakhun na ka Seng Congress na ka bynta ka elekshon ka ban sa long ha u snem 2023,” la bynrap u Bah Kansing.