Shillong, Jymmang 29: U Director ka Health Services (MI) Dr Aman War, hynne ka Sngi U Blei, ula thalaiñ kylla ïa u Principal Secretary ka Tnad Health bad ïa ka Indian Institute of Public Health (IIPH), Shillong halor ka jingkynnoh ba u kyndang jubor ïa kane ka Institute na ka Campus barim jong ka National Institute of Fashion Technology (NIFT) ba don ha Pastuer Hills, Lawmali.
U DHS(MI) ula kynnoh ruh ba kumno ka IIPH, Shillong ka pyndonkam ïa kane ka Campus barim ka NIFT kaba dei jong ka Tnad ka Koit ka Khiah bad bala ai pyndonkam sha ka Meghalaya AIDS Control Society (MACS) khlem ka jingbit na ka Ophis u DHS (MI) haba ong “Kane ka dei ka jingrung jubor sha ka jaka kiwei bad ka dei ka kam kaba biang eh ban ujor ejahar pyrshah ïa ka IIPH”.
U Dr Aman War ula kynthoh ïa kane halor ka jingkynnoh jong ka IIPH ba u DHS(MI) ula pynkylla khlem ïing ïa ka Institute da ka jingwan beh kynsan ha ka 27 tarik Jymmang na ka Campus barim ka NIFT ha kaba u Principal Secretary ka Tnad Health u Sampath Kumar ruh, ula pynrem ïa kane ka jingleh u DHS haba pynpaw ruh ïa ka jingbabe ïa kaei kaba la jia.
Haba pynshai ïa kane ka jingjia, u DHS (MI) u pyntip ba ha ka 27 tarik Jymmang 2022, ula ïoh pdiang ïa ka phone call na i Project Director ka MACS iba la kren ha ka sur kyiuh, ba don uwei u briew uba la pyndonkam jubor ïa ki kamra jong ka MACS ha Campus barim ka NIFT Shillong bala ai da ka Ophis u DHS(MI) bad shem ruh ba une u briew ula pynpait ïa ka tala bala khang da ka MACS.
“Wat hapdeng ka jingïalang jong ka Meghalaya Medical Services Association (MMSA), nga la mareh ban leit jngoh ïa kaei kaba jia bad ynda nga la poi, nga shem ba ïa ki kamra ka NIFT la pyndonakm da uwei u briew u ba nga ithuh kum u Dr T Jamir uba kam ïalade kum u Registrar ka IIPH. Nga la kylli ba mano ba ai jingbit ïa u ban pyndonkam ïa kine ki kamra” ïathuh u Dr Aman War.
U Dr Aman u pyntip ba uwei u Doktor T Jamir ula pyntip ba ïa kine ki kamra hapoh ka Campus barim ka NIFT la ai pyndonkam ïa ka Institute da u Principal Secretary ka Tnad Health & Family Welfare u Sampath Kumar khlem da pyntip sha u kum u DHS(MI) ba peit ïa kane ka jaka.
U Dr Aman u pyntip ba ha ka 1 tarik Jymmang, i Project Director ka MACS ila thoh shithi sha ka Ophis u DHS (MI) ba pan jingbit ban pyndonkam ïa ki kamra jong ka NIFT bad ka Ophis ruh kala ai jingbit ha kaba la pynbud da ka jingleit khang tala.
“Hynrei ha ka 27 tarik Jymmang, la shem ba ki briew kila kyndang jubor ïa ki tala. Dei namar kane, nga la bthah ïa ki ban mih mardor na kine ki kamra namar kane ka Campus ka dei ka nongkynti jong ka DHS(MI)” ong u Dr Aman haba bynrap “Ka jingkynnoh ba nga la pynibor bad kher tohmet ka dei kaba shu thaw bad ba thok. Nga la leit kum u DHS bad nga kren ruh kum u DHS”.
U Dr Aman ula pynrem jur ïa u Dr Jamir halor ka jingkren tohmet bad kren khor ïa i Project Director bad Deputy Director ka MACS bad ong ba kum kane ka jingleh jong u ka dei ka bym lah ban pdiang khamtam ba u dei u Doktor ba dang khynnah (Junior Doktor) uba dang dei ban burom ïa kine ki arngut ki Doktor ka MACS kiba la shakri haduh 30 snem tam.
Haba pynpaw ba ka jingkylli ba pyndonkam ka IIPH ïa ki kamra jong ka NIFT Campus kam mih satia, u DHS ula ong “Ka kam jong ka Capus barim ka NIFT ba ju pyndonkam mynshwa kum ka Ophis Malaria, ka dei jong ka DHS (MI). Kila don shibun ki shithi bala ïathoh hapdeng ka Directorate bad ka Sorkar halor ka jingpyndonkam ïa kane ka Ophis bad kala poi ruh ha ka khep baka Tnad Health kala ai ïa kane ka Building ban pyndonkam da ka National Health Mission ym ka IIPH”.
“Ka IIPH kala pyndonkam ïa kane ka campus khlem ka jingbit ne ka jingtip jong ka Ophis u DHS(MI) bad kane ka mut ruh ba ka dei ka jingrung jubor sha ka jaka kiwei bad ka dei ka kam kaba biang eh ban ujor ejahar pyrshah ïa ka IIPH” ong u Dr Aman.
U DHS ula pynpaw ïa ka jingkyndit ba u Dr Jamir ula pynmih kot khubor ba kynnoh ba ula kren tohmet bad kren khor haba phah mih ïa ka IIPH na ka campus jong ka NIFT bad ong ruh ba nga la pynkylla phetwit bad khlem Ïing ïa ka IIPH. “Ka jingshisha hi ka long ba ka IIPH ka dang pyndonkam ïa kiba bun ki kamram jong ka DHS (Malaria) ban pyn ïaid ïa ka University” ula kynnoh.
U DHS(MI) ula pyntip ba ka IIPH kaba kwah ban seng ïa ka University ha Jylla, kala ïoh ïa ka jaka ba heh haduh 20 acre ha Mawdiangdiang hynrei namar ka jingbym lah ban pyndonkam ïa kane ka jaka, ka Tnad Urban Affairs kala knieh noh. “Jin ba ka dei ka University kaba shimkhia bad ba ïaid bha, ka IIPH kala dei ban pyndpnkam ha ka rukom kaba dei ïa ka jaka ba 20 acre ha Mawdiangdiang” ula ong.
Halor ka jingong u Dr Jamir “Ngi la pyntip ïa kane ka kam sha u Principal Secretary ka Tnad Health bad une u Heh Ophisar ula kular ban ai jingkyrshan bad pynpaw ïa ka jingbabe ïa kaei kaba jia. Nga ngeit ba un sa leh eiei ïa kane”, u Dr Aman ula ong “Nga sngew thamula ba balei u Principal Secretary u babe ïa kaei kaba jia khamtam lei hadien ba u Dr Jamir ula kren tohmet kren khor ïa i Project Director bad Deputy Director ka MACS”.
Halor ka jingkynthoh u Principal Secretary ba ka Sorkar kala pan ïa ka jingpynshai na u DHS(MI) halor ka jing beh ïa ka IIPH na ka Campus barim ka NIFT, u Dr Aman ula ong “Nga dang pyrkhat ba une u Heh Ophisar IAS bala rangbah u dei u ba shemphang bad ba stad hynrei kumno ula shu rai kut khlem da tip ïa ka jingshisha ïa kaei kaba jia ha ka 27 tarik Jymmang bad ong ruh ba ka sienjam bala shim da u DHS(MI) ka dei kaba bakla”.
“Ïa u briew ba rung jubor, ka dei mo kaba bakla ban beh mardor. Nalor kata, ka shithi ba pan jingpynshai jong ka Sorkar ruh kam pat poi sha ka Ophis u DHS (MI) watla mynta ka janmiet sngi U Blei nga la leit sha Ophis ban wad la ka don ne em ka shithi ba phah da ka Tnad hynrei kam shym la don satia” ula ong.
Haba pynpaw ba u DHS(MI) u dei u Ophisar rangbah jong ka Sorkar bad u dei uba la don la ka jong ka bor bala pynkup da ka Sorkar, u Dr Aman ula ong “Nga la pyndonkam ïala ka jong ka bor ha ka 27 tarik Jymmang bad lada kane ka jingleh jong nga ka long kaba bakla, balei u Principal Secretary u khlem phone lane khot hajir ïa nga. Ka don kaei re kaei kaba buhrieh hangne?” bad bynrap “Ngan ïai ap ïa kane ka shithi na ka Tnad Health bad ngan sa ai ka jubab kumba ka long”.
U Dr Aman ula pynpaw ba kane ka jingkynthoh jong u Principal Secretary kala pynthohbria ïa u khamtam ba ula ai ka jingshakri la palat 32 snem ïa ka Sorkar bad ba la poi artad ka por ban shongthait ha ba kut jong u bnai Jylliew 2022. Kane ka dei ka jingpynthohbria na ka liang jong u Dr Jamir bad u Sampath Kumar.
