Shillong, Naitung 19: U Myntri Rangbah ka Jylla Conrad K Sangma ula leit ïashimbynta ha ka jingïalang paidbah jong ka CM-Connect, ka prokram ban ïakren ïakhana marmet bad ki paidbah, kaba la pynlong ha madan phutbol Kurkalong, Lumdaitkhla, Bhoirymbong.
Kane ka dei ka rynsan ïakynduh paidbah kaba ar ba la pynlong, ha kaba ki paidbah napoh ka Block kila wan ban ïashimbynta ban pynsngew ïa la ki jingeh ba ki ïakynduh.
Ki paidbah ki la pynsngew hakhmat u CM ïa ki jingeh ba kynthup naduh ka jingsniew ki surok, ka jingbym biang ha ka pule ka puthi, ka umbam umdih, ka bording elektrik, ka rep ka riang bad kiwei kiwei.
Haba ai jingkren, u Myntri Rangbah ula ong, “Ka CM-Conect Programme ka don ïa ki kyrdan bapher bapher hynrei ka jingthmu hi ka long ban wanrah shajan ïa ka synshar khadar sha u paidbah bad ban sngap dalade ïa ka jingeh ki paidbah”.
“Kam dei ïa ka Sorkar ban shna ïa ki prokram, ki skhim bad Policy da kaba shong na ophis hynrei ban pynbeit ïa ki katkum ka jingdonkam u paidbah. Ngi la wan ban sngap ïa ki jingeh jong phi bad tip ïa kaei kaba treikam bad kaei ka bym treikam. Kane ka dei ka rynsan kaba paka bha namar ngi don ïa ki nongmihkhmat na baroh ki tnat Sorkar ban ai ïa ka jubab bad ngi lah ruh ban pynkhreh ïa ki lad ki lynti ban pynbeit ïa kiei kiei baroh,” ula ong.
Ki paidbah kiba la wan ïashimbynta, kila pynpaw ïa la ki jingsngewkhia bad ki jingeh ba ki ïakynduh ha ki tnat bapher bapher kum ka Jal Jeevan Mission (JJM), ka pule puthi, ka jingsniew palat ka surok VIP road bad khamtam eh halor ka jingai jingkyrshan ïa ki briew kiba don jingduna ha ki dkhot met.
U Myntri Rangbah bad ki Heh Ophisar jong ki tnat bapher bapher kila ai jubab bad pynshai ïa ki jingkylli bad jingsngewkhia jong u paidbah. U Myntri Rangbah ula kular ruh ïa baroh ba ka Sorkar kan sa khmih bniah bha ïa kine ki jingpynsngew jong ki.
Ha kane ka sngi, u Myntri Rangbah u la sam ruh ïa ki Cheque sha ki Community Based Organisation (CBO), CLF, VO hapoh ka NRLM Community Investment Fund (CIF) sha ka Kynthupiang Cluster Level Federation, Kyrdem ba la mang sha ki 31 tylli ki SHG.
Ula aiti ruh ia ki CIF sha ki 36 tylli ki VO na ka bynta ki 129 tylli ki SHG lem bad ka Vulnerability Reduction Fund ia ki 8 tylli ki VO. Nalor kine, ula sam ruh ia ki 11 tylli ki Bolero Pickup sha ki nongioh bynta jong ka CM Elevate.
