South Korea, Jymmang 21 : Ka kynhun ïalehkai Compound ba kynthup ïa u Abhishek Verma, Rajat Chauhan bad Aman Saini ki wanran nam bad burom ïa ka ri da kaba khur takma ksiar ha ka Archery World Cup 2022 hadien ba ki la pynliem ïa ka kynhun jong ka France ha ka sngi Saitjaiñ.
Ka India ka la khur ïa ka takma ksiar da kaba pynliem ïa ki rangïalehkai ka France ba kynthup ïa u Quentin Baraer, Jean Phillipe Boulch bad u Adrien Gontier da 232-230.
Kane kadei ka sien khur takma ksiar kaba arsien na bynta kitei ki lai ngut ki rangïalehkai ha ka World Cup bad bat kyrdan ba nyngkong ha ka Stage 1 ha Antalya, Turkey. Bad ha kane kajuh ka World Cup, ka France ka wan ha ka kyrdan ba ar.
Katba u lahduh barim ka Asian u Abhishek Verma u la jop ïa ka takma rnong ha ka ïalehkai khleh (Mixed team) ha ryngkat ka Avneet Kaur. Ki shijur jong ka Turkey Emircan Haney bad Ayse Suzer ki jop da 156-155 bad wan kyrdan ba lai ha ka play-off.
Ha ka jingshisha ka India ka ïoh ka kabu ban khur shuh ka takma ksiar hynrei u Mohan Bhardwaj u la rem noh ha ka final ba para marwei jong ki shynrang hakhmat u Mike Schloesser. U Mohan, uba wan kyrdan ba 42 hadien ka wat ïakop knieh rung, u la rem noh da 141-149.
Ki lai tylli ki takma ha ka sngi Saitjaiñ ka India ka kynjoh sha ka kyrdan ba ar (stage 2) da kaba khur san tylli ha ka Archery World Cup 2022 to five.
Dang shen, ka kynhun ïalehkai compound jong ki kynthei ba kynthup ïa ka Avneet Kaur, Muskan Kirar bad Priya Gurjar bad ka kynhun recurve ba kynthup ïa ka Ridhi, Komalika Bari bad ka Ankita Bhakat ki ïoh khur takma rnong.
Katba ha ka liang ka kynhun ki shynrang (recurve) ki khlem poi sha ka thong khur takma. U Jayanta Talukdar udei tang ma u, uba la kynjoh sha ka thup ki phra ngut ha ka men’s recurve.
