Bthah u Dy CM ïa ki DC bad EE ban lum jingkheiñ ban tei pat ïa kiba shah pynjot

Shillong, Jymmang 20 : Mynta ka sngi u Symbud Myntri Rangbah ka jylla u bah Prestone Tynsong u la kren sha baroh ki Deputy Commissioner (DC), ki SE bad EE PWD jong ki Division bapher bapher lyngba ka Video Conference ha kaba u la bthah ïa ki ba kin lum jingkheiñ noh nadong shadong ïa kito kiba la shah pynjot pynpra ha ka jingther u lapbah ha kine ki khyndiat sngi khnang ban ïoh ban pynbha pat ïa ki bad ban ym shah ktah ka leit ka wan bad ka kit ka bah jong ki paidbah.
Haba kren bad u nongthoh khubor u la ong “ Nga la kren da ka Video Conference mynta ka sngi sha baroh ki DC jong ki District bapher bapher ki SE, EE jong ki Division bapher bapher bad Commissioner Secretary ka tnad Revenue khnang ba kin lum jingkheiñ ïa kiba la shah pynjot pynpra bad phah sha ki DC bad ba ki DC kin ïoh ban phah sha ka tnad Revenue kaba dei peit ïa ka Disaster Management ban ïoh mang pisa kloi kloi ban ïoh pynbha ïa kiba la shah pynjulor namar ngim kwah ba kane ka jingshah pynjulor ki surok bad shah rong ki jingkieng kin ktah ïa ka leit ka wan bad ka kit ka bah ki paid nongshong shnong jong ki shnong bapher bapher kiba ngat ha ka apot jong ki bor mariang”.
“ Kane ka dei ka sien ba nyngkong ba la ïoh ïa u lapbah lyiur mynta u snem bad shah pynjulor jur katne katne bad ngi duwai ba U Blei Un ym shah shuh ba ki jingshah pynjulor kin dang wan jia” ong biang u Symbud Myntri Rangbah
Ka tnad PWD ka la rai ban pynbha ïa baroh ki surok bad jingkieng ba la shah pynjulor bad ka jingpynkhreh ïa ki jingkheiñ jingdiah da ki Engineer ka dang ïaid shakhmat. “ Baroh ki Engineer jong ki Division bapher bapher ki la leit sha ki jaka ba shah pynjulor ban lum jingkheiñ jingdiah khnang ban tip haduh katno ka jinglut jingsep kan kot na ka bynta ban pynbha pat ïa kine kiba la shah pynjot pynpra ban ïoh mang pisa kyrkieh ne ban wad lad wad lynti kumno ban ïoh shna kloi ban ym shah ktah ki paidbah”.
“Ha kane ka jingther jur u lapbah, ki don ki surok kiba la shah rong bad shah pynjulor, ki don ki jingkieng kiba la shah rong, ki don ki jaka ba jur ka jingtwa, kumta nga la bthah ïa baroh ki engineer ban shim khia ïa ka kam da kaba ki dei ban don beit ha ki ophis treikam jongki ba kin ïoh leit sha ki jaka ba jia kino kino ki jingshah lyngshop ha ki bor mariang ban ïarap kyrkieh mar mar nalor kata ban lum jingkheiñ bad ai jingkieñ mar mar sha ki DC khnang ba kin ïoh ban phah sha ka tnad Revenue Disaster Management ban mang pisa kloi” ong u Bah Prestone.