Byrthen ka Ïingkashari ban leh tyngeh ïa ki bor Sorkar lada buh jingma ïa u paidbah

Shillong, Jymmang 20: Ka Ïingkashari Meghalaya High Court hynne ka sngi thohdieng kala byrthen ban ai da ka hukum ba tyngeh pyrshah ïa ka Sorkar Jylla bad ki bor District lada buh ïa ka jingim u paidbah ha ka jingma naka jing pynslem ban pynbeit ïa ka kam theh ñiut ka sor Jowai mynta la arbnai.
Ha ka hukum, ka Ïingkashari jong ki arngut ki Nongbishar ba kynthup ïa u Chief Justice Sanjib Banerjee bad u Justice W Diengdoh kala ong “Kane ka dei ka kam kaba ym don lynti ban pynbeit da ka Ïingkashari hynrei ka Ïing kashari kan nym artatien ban pynmih da ka hukum kaba lah ban long kaba tyngeh ïa ka Sorkar ne ki bor District, lada ka jingim jong ki paidbah ka don ha ka jingma na ka daw ka jingbym idon dak ïa ka jingshimkhia jong ki borkhmih ïa ka kam ñiut ha sor Jowai”.
“Ki don ki jait kam kiba ka Ïingkashari ka don da u pud ban tuklar kat kum ka jinglong ka kam. Ki Nongbishar kiba shong ha Ïingbishar kim pat ban ithuh ïa ki jaka ban pyndonkam kumki jaka theh ñiut ba shirta ne ba shipor bad ka por kala dei ïa ka Sorkar Jylla ban ki bor District ba kin kham shimkhia noh bad ban leh eiei noh na ka tyrpeng jong ka Ïingkashari” kala ong haba bishar ïa ka PIL bala mudui da ka Synjuk ki Waheh Shnong Jowai.
Ka Ïingkashari kala ong ba ka jingeh (bym don jaka theh ñiut ka Jowai) kala ïaid mynta la jan arbnai bad ki nong shongshnong ka Jowai kila shu ïai shah palat haba hukum ïa ka Sorkar ba ka dei ban wanrah noh ïa ka lynti kaba biang eh hapoh ka 10 sngi ban weng ïa kane ka jingeh.
Halor ka jingujor jong ka Synjuk ba ki jaboh ba mih na ki thliew Ïing kila nang kynton ha manla ki Ïing ha Jowai namar ka jingbym don ki lad ki lynti ban leit pynkhuid ïa ki, ka Jowai Municipal Board kala pyntip ba ka jingpynkhuid ïa ki jaboh na ki surok bad ki jaka ïing kala ïaid manla ka sngi bad la kit ïa ki da ki trok sha ki jaka theh ñiut ba shipor.
Ka Ïingkashari kala hukum ïa ka JMB ba ka dei ruh ban leit lum ïa ki ñiut na ki thliew ïing ha ka jingleit lum ïa ki ñiut na ki surok bad ki jaka iew.
Ha kajuh ka por, ka Sorkar Jylla kala pyntip ba ka jingpyrshah jong u Rangbah Shnong jong ka Shnong bala ithuh ïa ka jaka ban pynlong jaka theh ñiut ba shirta ka dang ïai bteng haduh mynta ïa kaba ka Ïingkashari kala ong “Ka Sorkar Jylla bad ki bor District ki dei ban lap ïa ka lynti ban pynbeit ïa kane bad ym lah satia ban don ka jingpyn bna na ka Ïingkashari ba kano ka jaka ka dei kaba biang eh ban pynlong jaka theh ñiut”.
Ka Sorkar Jylla kala pyntip ruh ba ïa mynta, kala shim ïa ka sorkar ban pyntreikam ïa ka Solid Waste Management ha ka jingmang tyngka ba palat ïa ka T. 13 klur.
Ka Ïingkashari kala bthah ba ka Sorkar ka dei ban ithuh noh kham kloi ïa ka jaka theh ñiut ba shirta bad ban pyn beit noh wut wut ïa ka kam kam pher la ka dei kaba jngai katno katno ruh na Jowai haba ong “Ka kam hi kam lah ban ap lane ban ailad ïa ki ñiut ba kin nang kynton la ka dei ha ki jaka paidbah ne ki Ïing ki sem tad haduh ban da lah pyn treikam ïa ka Solid Waste Management”.