Shillong, Jymmang 20: Ka Inquiry Commission hynne ka sngi thohdieng, kala aiti ïa ka kaiphod jingtohkit halor ka jingkynnoh siat ïap ïa u Nongïalam barim ka Hynñiewtrep National Liberation Council (HNLC) Bah Cheristerfield Thangkhiew, kaba jia myn ha ka13 tarik Nailar 2021.
Ïa kane ka kaiphod la aiti sha u Myntri Rangbah ka Jylla Conrad Kongkal Sangma da u Chairperson ka Meghalaya Human Rights Commission (MHRC) Justice T Vaiphei, uba khlieh ïa ka Commission.
Haba ïakren bad ki nongthoh khubor, u Vaiphei ula kyntait ban ïathuh ïa ka jingshem jong ka Commission bad ong “Kane ka dei ka kam ba ym pat lah pynpaw pyrthei”.
Ula pyntip ba ka shimpor ïa u haduh hynriew bnai ban pyndep ïa ka kaiphod hadien ka jingshong bishar ba kot haduh 20 sien kynthih. Haduh 12 ngut ki nongsakhi kila wan ban ai sakhi haka jingbishar jong ka Commission.
“Nga la bishar ïa san ngut ki Nongsakhi kynthup ïa u Medical Officer uba leh ïa ka Post Mortem, saw ngut ki Heh Pulit. Na ka Ïing jong u Bah Cherist, nga la shong bishar ïa san ngut ki nongsakhi bad arngut kum ki nongsakhi jong ka Commission kiba dei ki Investigation Officer (IO) jong ka jingjia bthei bomb IED ha Khliehriat bad uwei pat u IO jong ka jingjia ha Mawlai” ong u Justice Vaiphei.
Haba pynpaw ba ka kam mynta kala don ha ka kti jong ka Sorkar Jylla, u Chairperson ka MHRC ula ong ba ula leh ïa kaba biang eh ka kam bad ula hun jrut ïa ka kaiphod bala aiti sha ka Sorkar Jylla.
“Haba ïadei bad nga hi, nga la leh kat kaba nga lah ban pyndep bad leh ruh kat ka jinglah jong nga khlem da ïaid lait shuh ïa kiei kiei baroh ban wanrah ïa ka kaiphod kaba janai bha. Mynta ka kam kala don ha ka kti jong ka Sorkar Jylla” ula ong.
Kumban shu pynkynmaw, u Bah Cherist ula shah siat ïap hala ka jong ka Ïingsah ha Mawlai Kynton Massar ha ka step phyrngap jong ka 13 tarik Nailar.
Ki Pulit kila kynnoh ba une u Nongïalam barim ka kynhun kiengatiar ula ïakhun pyrshah ïa ka kynhun ki Pulit da ka tarik ha ka por ba ki dang pyrshang ban rung sha ïing bad jingkhynra ban kem ïa u halor ka jingdonkti ha ki artylli ki jingpynbthei bomb IED kaba jia ha Laitumkhrah myn ha ka 10 tarik Nailar bad ha Khliehriat Police Reserve myn ha ka 14 tarik Naitung.
Hynrei, ki bahaïing jong une u Nongïalam barim ka HNLC uba don jingshitom ha u Khyllai, kila ong ba kane ka jingwan khynra ka dei kaba la thmu lypa da ki Pulit tangban pynïap ïa u.
Ha ka 15 tarik Nailar, 2021, ka Nongbah Shillong kala sakhi ïa ka jingïakhih ba jur jong ki paidbah kiba la bitar lep halor ka jingsiat ïap ïa une u Nongïalam barim ka HNLC hala ka jong ka Ïingsah.
Kawei ka kali Pulit kala shah wiang ding ha ki samla ha Jaiaw bad ruh haduh lai tyli ki suloi INSAS jong ki Pulit kila shah knieh ha Mawlai Mawkynroh. Hynrei ha ka 23 tarik Nailar, ki Pulit kila ïoh tamnoh ïa kine ki suloi na Wah Umkhrah.
