Khliehriat, Rymphang, 21: Dang myn ha ka 16 tarik mynta u bnai rymphang, ki paidbah jong ka shnong Umrasong bad shnong Nongsning, East Jaiñtia Hills District ki la mih paidbah bad pyrshah ïa ki karkhana coke kiba don hajan kiba dang pyntrei shaid shaid mynta bad ka jingpyntrei ïa kine ki karkhana ka la ktah ïa ki tyllong umbam umdih kiba don hajan, kumta halor kane, ka Hynñiewtrep Achik National Movement Jaiñtia Zone ruh ka pyrshah jur bad ai ka jingkyrshan kaba pura ïa kitei ki ar shnong.
Na ka liang ki nongialam ka HANM Jaiñtia Zone, ba kynthup u President u bah Mihsalan Thoo, u Vice President, u bah Robel Pakma bad u General Secretary, u bah Wankishwa Mawlong ki la pynpaw ka jingsngewkhia halor ka jingshah ktah ki tyllong um kiba don hajan ka shnong Nongsning bad shnong Umrasong bad ki la kyntu ïa ka sorkar, ïa ki bor district ba ki dei ban peit bniah bha halor kane ka jingshah ktah ki tyllong um bad jingshah ktah ka mariang bad ong ruh ba lada ka sorkar kam leh eiei ka seng kan mih madan ryngkat bad ki nongshong shnong ban ieng pyrshah ïa ki coke kiba dang pyntrei mynta.
Kum ban shu phai dien, ha ka 13 tarik mynta u bnai u Waheh Shnong jong ka shnong Nongsning bad Umrasong ki la leit iakynduh ïa u Member Secretary jong ka Meghalaya State pollution Control Board bad pynpaw ka jingpyrshah halor ka jing ai laisen ïa san tylli ki Coke Plant kiba kyrteng ka M/S M M Minerals, M/S Unique Industry (2nd Chimney), M/s Presidium Breez, M/s Magic Coke bad ka M/S Ioanis Industries Private Limited (Chimney 2) kiba don hajan jong kine ki shnong khamtam ha ka iadei bad kawei na ki coke plant kaba kyrteng M/S Presidium Breez kaba la pynjulor ïa ka tyllong um jong ka shnong Nongsning.
Ka dorbar shong Nongsning kaba la dep ban buh ïa ki jingujor lah bun bun sien naduh u snem 2022 sha u Deputy Commissioner ka East Jaiñtia Hills bad kiwei kiwei ki tnat ba dei khmih ïa kane ka kam bad kyntu jur ba ym dei ban ai laisen ïa ki coke plant namar ki pynjakhlia ïa ka ka lyer bad mynta ki pynjot sa ïa ki tyllong um kiba don hajan.
