Shillong, Nohprah 17: Ka rynsan ïakop pyni jingtbit ha ka Karate kaba la tip da ka 29th State Karate Championship la pynhap pyrda noh hynnin ka Sngi Saitjaiñ jong ka taïew ba ladep ha kaba ki nongïashimbynta napoh East Khasi Hills ki la long ki lahduh ha baroh ar kyrdan, Shynrang bad Kynthei.
Kane ka lympung kaba ar Sngi lynter la pynlong hapoh JN Indoor Stadium, ha Polo Ground bad la pynïaid da All Meghalaya Karate-Do Association (AMKA), ha ryngkat ka jingkyrshan na ka Directorate of Sports and Youth Affairs, jong ka Sorkar Jylla. Kumban shu pynkynmaw, ki la don haduh 372 ngut ki nongïalehkai karate kiba la wan ban ïashimbynta ha katei ka jingïakop, kiba kynthup naduh kiba dang 10 snem haduh kiba la kham heh.
Ha ka sngi pynkut la wan sakhi da u Prof Dr C Daniala, Medical Superintendent of NEIGRIHMS kum u Kongsan. Kiwei pat kiba la don ryngkat ha katei ka sngi ki kynthup ïa u General Secretary- Meghalaya State Olympic Association (MSOA) Bah Finely L Pariat, u Bah Dipshon Ryntathiang- MSOA Executive Council Member nangta u Bah Aiborlang Shabong- Deputy Chief Accounts Officer of MeECL.
Ha kane ka kynti la sakhi ba ka rukom lehkai ka la nang kiew shaphrang, ha kaba ki nongïalehkai karate ki la lah ban sei madan ïala ka jong ka sap ha ka kata (form) bad ruh ha ka kumite (sparring), ïa kaba maki ki la pynjanai da ka jingtreishitom sngi bad snem ha ka por kilanmet, ïa kaba la ïoh jingïaroh ruh na kiba shah khot sngewbha, kumjuh ruh na ki longïing lem bad kiwei kiwei.
Ka Ri-Bhoi ka la pynkut ïa ka lympung ha ka kyrdan ba ar na ka thup ki Shynrang, katba ka West Jaintia Hills ka la khur kyrdan ba ar na ka thup kyrdan jong ki Kynthei.
ïa ka nam Best Karateka ha ka thup lehkai jong ki khynnah shynrang la khur da u Hymnson Challam jong ka West Jaintia Hills. U ne u khynnah u la jop takma ksiar ha ka thup ‘Boys’ 13 Years kumite event’. Katba ka nam ‘Best Karateka’ ha ka thup shynrang kiba la heh la khur da u Paul Danny Kharmudai jong ka East Khasi Hills. U la jop haduh ar tylli ki takma ksiar, kawei ha ka Men’s +60kg kumite bad kawei ha ka Men’s Open kata events.
Haba phai pat sha ka kyrdan ki khynnah kynthei, ka nam Best Karateka la khur da i Kimjonlhing Silthou jong ka East Khasi Hills, kaba la jop takma ksiar ha ka Girls’ 8 Years kumite. Na ka liang jong ka Rebeka Nongspung (East Khasi Hills), kaba la jop ar tylli ki takma, kawei ha ka Women’s -50kg kumite bad ha ka Women’s Open kata, ka la khur ïa ka khusnam ha ka thup kyrdan kynthei kiba la san.
Hadien kane, kine ki nongïalehkai karate kin bteng ban kilanmet ban dang pynjanai shuh shuh ïalade ban pynkhreh na bynta ka 5th Meghalaya Games ka ban long ha u bnai ban wan, ha Tura. Kin don ruh napdeng jong ki, ki ban pynkhreh na bynta ban leit ïakop shabar ka jylla. Kumban shu kdew hangne, ka AMKA ka la sei palat 200 ngut ki nongïalehkai karate kiba la ïoh khur takma ha ki rynsan ïakop national bad ruh international ha kine ki saw phew snem naduh ba la seng ïa ka.
