Maramot ka ITC India Limited ïa ka jingkieng Dam Site, buh thong ban pyndep hapoh 4 bnai

Nongpoh, Nohprah 13: Ki kali paidbah kiba ïaid lyngba ka surok National Highway-6 ki la ngat ha ka dheng kali kaba jur naduh ka thaiñ Umïam ban kiew sha nongbah Shillong namar ka jingsdang ban maramot biang ïa ka jingkieng Damsite kaba la sdang ban orpait bad buh jingma ïa ka leit ka wan jong ki paidbah namar ïa ki kali la hap ban pynïaid tang shilliang jong ka surok ban jam ïa ka jingkieng Umïam.
Ïa ka jingmaramot la sdang ha ka sngi Balang ba la pyntrei da ka ITC Cementation India Ltd. hadien ba la ïoh jingbit na ka Sorkar Jylla bad ka jingmaramot ïa ka jingkieng kan neh kumba 4 bnai eiei. La sakhi ai ka jingsdang ban ksam thliew ïa ka jingkieng bad kane kan ktah shibun ïa ka leit ka wan jong ki paidbah ha kaba na ka liang ki bor Pulit ka Ri-Bhoi ki la bunkam ban pynbeit ïa ki kali ba leit ba wan.
Namar ka jingjur palat ka dheng kali ki bor pulit ka Ri-Bhoi ha ka por janmiet ki la khang noh ïa baroh ki kali ban kiew sha nongbah Shillong bad ban ïaid lyngba na ka jingkieng Damsite katba ka jingmaramot ka dang ïaid shakhmat.
Baroh ki kali kiba kiew sha nongbah Shillong ki la hap ban ïaid na Umroi ban kiew na Umrynjah lyngba ka surok VIP Road ban mih sha Mawlai Mawkynroh, katba ki kali kiba mih na Shillong ban leit sha Guwahati kin dang ïoh hi ban ïaid lyngba ka jingkieng Damsite.
Haba ïakren bad u Construction Manager jong ka ITC Cementation India Ltd. u Hanuman Kalamb u la ong ba ka jingmaramot ïa ka jingkieng ka la sdang hadien ba la ïoh bor na ka Sorkar Jylla bad kum ka kompani ka la sdang ban ksam thliew ha ki bynta ba shapoh ba donkam ha ka jingkieng ban thep dewbilat ban kyrshan ha ki bynta ba la shong synjor ka jingkieng.
U la ong ruh ba ka jingkieng ka dei shisha kaba la rim bad kaba la kut ka por jong ka bad ka buh jingma shikatdei namar ka jingkhlaiñ jong ka um kaba la lang ha ka pung Umïam kumta lyngba ka jingmaramot biang ïa ka jingkieng kan sa lah ban pynjlan biang ïa ka por bad jingkhlaiñ jong ka jingkieng sa kumba 25 snem eiei.
Na ka liang jong ki nongtrei jong ka kompeni kin pyrshang ruh ban trei miet bad sngi bad angnud ruh la kumno kumno yn pyndep ïa ka jingmaramot hapoh 4 bnai.
U Construction Manager u la ong ba kane ka jingmaramot ïa ka jingkieng kan ktah shisha ïa ka leit ka wan jong ki paidbah ha kaba yn pyrkhing noh ïa ka leit ka wan ki kali ban ïaid lyngba ka surok khamtam ki kali heh ba kum ki nongpyntrei ïa ka jingmaramot jingkieng kin lah ban trei bha bad ban pyndep ha ka por kaba biang kumba la buh ïa ka thong.