Ha ka jingdap 22 snem ba thombor ki lehnoh, shah thombor biang ka Parliament

New Delhi, Nohprah 13: Hadien 22 snem ba ka Parliament jong ka ri India ka la shah hiar thma ha ki lehnoh, mynta ka sngi pat ka la shah thombor ha ki briew kiba la rah da ki tiar ba pynmih tdem bad ki la ïoh rung syndon hapoh jaka ba shong dorbar. Kane kadei ha ka Parliament kaba thymmai katba ka dorbar Lok Sabha ka dang ïaid shakhmat.
Lah ban kdew hangne ba ha ka 13 tarik u Nohprah u snem 2001, ka Parliament jong ka ri India ka la shah hiar thma ha ki lehnoh, ha kaba san ngut ki lehnoh kiba la kieng atiar bha ki la hiar thma ia ka ïingdorbar thawaiñ jong ka ri India. Hadien ka jingïakhun bad ki Pulit pahara, baroh san ngut ki lehnoh ki la shah siat iap bad 8 ngut ki Pulit bad uwei u nongsumar kper ka Parliament ki la kyllon ïap ha ka jingïakhun.
Mynta ka sngi pat napdeng kine ki saw ngut kiba la rung ha Parliament, arngut, u Sagar Sharma bad u D. Manoranjan ki la ïoh rung shapoh ban pynmih da ka tdem kaba stem bad arngut pat, ka  Neelam Devi bad u Amol Shinde – ki la ïoh rung ha phyllaw ban pynmih da ka tdem kaba saw bad ba stem.
Ki Pulit ki ïathuh ba ki don sa arngut kiwei pat kiba la ïasuh buit ban thombor ïa ka ïingdorbar jong ka ri. Uwei napdeng kine kiba la ïoh rung shapoh la lap da ki bor Pulit ba u ïoh ïa ka Entry Pass na u MP jong ka Seng BJP na Karnataka, u Pratap Sinha.
Kane ka jingïoh rung kine ki briew sha Parliament ban leh ïa kine ki kam pyntriem, ka la buh ka jingkylli kaba jur halor ka jingsynjor ka rukom pahara ha ka Parlaiment jong ka ri India.
Ki khubor ki ong ba kine ki hynriew ngut kidei kiba la ïaithuh bha uwei ïa uwei la bun snem bad ki la ïa plan lang na ka bynta kane ka jingthombor ïa ka Parliament.
Shuh shuh la ong ba ka Neelam Devi, 42 snem ka rta, kadei ka nonghikai bad ka dang pynkhreh ban ïaleh ïa ka eksam Civil Services. La ong ruh ba ka la ïashim bynta ha ka jingïakhih kaba jur jong ki nongrep ha ka snem 2020.
Kane ka jingpynmih tdem kine ki runar ka la jia ha ka por ba ka dang don ka Zero Hour Session. La ong ruh ba mar ïohi ba uwei napdeng kine u la rung sha jaka ba long dorbar ban pynmih tdem, ki MP ki la kynrup bad don ruh kiba la ktah kti ïa u.
Ki khubor ki ong ruh ba kine ki la phla ba ki leh ïa kane ka kam jong ki ban pynpaw ka jingpynrem jur ïa ka jingsynshar donbor ha ri India. Mynta baroh ki la shah kem bad yn pynlong ka jingtohkit kaba bniah ïa ki kynthup ruh ka jingtohkit kaba ïadei bad ka kam lehnoh jong ki.