Dehradun, Naiwieng 21: Saw phewwei ngut ki nongtrei kiba trei ha ka Tunnel jong ka surok ha Uttarakhand, ki la sahkut mynta la shiphew sngi bad haduh mynta ym pat lah ban sei ïa ki.
Kane ka tunnel kadei ka bynta jong ka surok ba la tip kum ka Silkyara-Barkot Express kaba la shna da ka sorkar u Modi ban pynjan ïa ka jingleit ïaid pilkrim sha Uttarakhand.
Kine ki 41 ngut ki nongtrei ki la sahkut ha kane ka tunnel naduh ka 12 tarik mynta u bnai, haba ka la don ka jingtwa hapoh ka tunnel kaba la mih na ka jingtwa khyndew ha ki bynta ba long lum ba kane ka tunnel kadei ban îaid.
Hadien kumba shiphew sngi, kiba haïing hasem jong kine ki nongtrei ki la sdang ban ïoh pynhiar mynsiem, haba lyngba ki video ba la thep lyngba ki pipe ba la thep shapoh ka tunnel, ki nongtrei ki la ïoh ban kren ïa kiba haïing hasem ban ïathuh ba haduh mynta kim pat lei lei, hynrei ki dang shait dang khlaiñ, kaba ki la sahkut kumba 260 Meter nakhmat jong ka Tunnel.
Lyngba ki pipe ba la phrung shapoh, la ïoh lad ruh ban phah ïa ka bam ka dih ba kine ki nongtrei kin ïoh bam.
Ki bor pynïaid jong ka National Disaster Management Authority (NDMA), ki la ïathuh ba ka jingïoh bush ïa ki pipe ka long ruh ban ïaleh ban sei ïa kine ki nongtrei shabar jong ka tunnel na ka jaka ba la twa kaba la khang sbak ban mih ne rung shapoh ka tunnel.
Ïa kane ka tunnel la shna da ka Navayuga Engineering Company Limited na Andhra Pradesh.
Ryngkat ka jingïatreilang bad ka sorkar jylla, ka sorkar pdeng bad ki NDMA, ki bor pyniaid ki kyrmen ba yn lah ban sei lut ïa ki nongtrei shabar, namar ba ban weng ïa ka khyndew bad ki maw ba la twa shapoh, ka long ka jingma ïoh ba ka don biang ka jingtwa.
