Shillong, Naiwieng, 21: U Bah Standling David Khongwir uba long u Symbud Myntri Rangbah barim jong ka Jylla Meghalaya u la khladnoh na kane ka sla pyrthei ha ka step sngi Baar ha NEIGRIMHS Hospital.
Une u rangbah uba la don 90 snem ka rta ïa uba ki paidbah ki ju tip kum u Bah SD Khongwir u la khladnoh hadien ka jingpang kaba la bat la kham slem.
U Myntri Rangbah ka Jylla Conrad Kongkal Sangma tang shu ïoh jingtip halor kane ka jingjia u la leit sngewlem ha ing jong u Bah Khongwir bad pynpaw ruh ïa ka jingsngewsih bad ong ruh ba u Bah Khongwir u dei u riewsaiñpyrthei uba la ih bha bad uba la aiti lut ïa la ka jingim ha ka kam shakri paidbah tad haduh ba un da khladnoh na kane ka sla pyrthei.
La synran ïa u Myntri Rangbah da ka Myntri ka Koit ka Khiah ka Dr. Ampareen Lyngdoh lem, ka MLA jong ka Sutnga Saipung Constituency ka Kong Santa Mary Shylla bad u MLA jong ka Sohra Constiteuncy u Bah Gavin M. Mylliem. Nalor kine, la sakhi ruh ïa u Chief Secretary barim ka Jylla u Bah WMS Pariat bad kiwei kiwei ki riewpawkhmat kiba la leit sngewlem ha ka ing jong u Bah Khongwir.
U la pynpaw ba ka Jylla ka la ithuh ïa u Bah Standling kum u briew uba la noh shibun eh ïa u synñiang u bynhei ïa ka Mawlai Constituency bad ïa ka Jylla baroh kawei ha ka jinglong nongmihkhmat paidbah haduh 25 snem kynthih.
“La ju tip ïa u (Bah Standling) kum u briew uba ki paidbah ki ieid bad ki ñiew burom bha. Kane ka paw na ka jingïoh ïa ka jingkyrshan wat hadien ba um long shuh u MLA, watla katta ka jingkyrshan, ka jingieid na ki paidbah ka pynpaw shai ba u dei u nongïalam uba kumno,” ong u Conrad.
“Nga la ïoh ka lad ban ïakren, ban ïakynduh bad ban ïatrei lang bad u (Bah Standling) ha ki snem ba la leit noh. Ha ka por ba u dei dang long u Rangbah Shnong ngi la ïakynduh la katto katne sien. Namarkata, nga la ïoh bha ka kabu ban ïoh jinghikai na u bad ban ïoh ïasyllok bun kiei kiei kiba la long ki jingmyntoi,” la ïathuh u Myntri Rangbah.
Shuh shuh u la ong ba ka jingkhladnoh jong u Bah Khongwir ka dei ka jingduh ym tang ïa ka Mawlai Constituency hynrei wat ïa ka Jylla hi baroh kawei.
Katkum ka jingtip ba la ïohlum na ki bahaiing hasem, ïa ka met ba dang sah jong u Bah SD Khongwir yn pyndep ha ka 24 tarik u Naiwieng, 2023.
U Bah SD Khongwir u la shakri kum u MLA jong ka Mawlai Constituency haduh 25 snem kynthih. U la jop ïa ka Elekshon ha u snem 1972 bad u la shakri ïa ki paidbah jong ka shnong Mawlai haduh u snem 1993.
Ha ka jinglong nongmihkmat u la Bah Khongwir ula long ruh u Symbud Myntri Rangbah hapoh ka Sorkar jong u bad u Bah Brington Buhai Lyngdoh bad ha shwa kata, u la bat ïa ki tnat kiba heh hapoh ka Sorkar jong u Bah Darwin Diengdoh Pugh .
U long ruh u Chairman jong ka State Planning Board bad u la noh synñiang shikatdei eh ban pynwandur ïa ka jingkiew irat jong ka jylla.
U Bah Khongwir ula rung sha ka jylli jong ka saiñpyrthei da kaba pynïasoh bad ka Hills State People Democratic Party (HSPDP) bad u la long uwei na ki riewrangbah uba la don bynta ha kaba pynkha pat ïa ka United Democratic Party (UDP).
U la long u Rangbah Shnong jong ka shnong Mawlai Nonglum jin haduh 55 snem kynthih .
Ha u snem 1968, u la shakri ruh kum u President jong ka Mawlai Town Dorbar (MTD) haduh u snem 1988.
