Watla u Nantu Das u don ha kti ka aiñ, u VC u dei ban thung ïa ka jingtohkit : NEHUTA

Shillong, Naiwieng, 21: Ka NEHUTA kaba long ka kynhun jong ki nonghikai ka skulbah NEHU ha ka sngi Baar ka la dawa ïa u Vice Chancellor jong ka skulbah NEHU ba u dei ban thung da ka jingtohkit watla u Nantu Das uba la shah kynnoh ba u donkti ban jrong kti ïa kawei ka Referee u dang donkti mynta ha ka kti jong ki Pulit.
“Watla u Nantu Das u dang don mynta hapoh ka Judicial Custody, hynrei u Vice-Chancellor u dei ban thung ïa ka jingtohkit hapoh ka NEHU khnang ba u nongleh kam bymman un ym lah shuh ban wan phai sha ka kam bad ban pynjngut ïa ka jinglong jingman hapoh ka skulbah. Lada ym bud ïa ki kyndon kumba la dawa da ki kynhun bapher bapher, yn ñiew ïa u Vice-Chancellor ba u pyrshang ban ai jingïada ïa u nongleh bymman. Na ka bynta ka jingshngaiñ jong ki samla pule, khamtam ki samla pule kynthei, ki nonghikai bad ki dkhot jong ki kynhun kiba ïadei kam bad ka NEHU, lada mih kano kano ka jingshah kynthoh kan ktah beit beit ïa ka kyrteng jong u Vice-Chancellor.”
“Namarkata, ngi kyntu ïa u Prof. P. S. Shukla ban pynshitom ïa u nongleh kam bymman. Shwa ban mih kino kino ki kynrum kynram, ka dei ka kamram jong ki bor ba dei peit bad khamtam eh u Vice Chancellor ban pynthikna ba ka Campus jong ka skulbah ka dei ban long kaba shngaiñ na kino kino ki riewbymman.”
“Ngi kyntu ïa ki paidbah nongshong shnong ka jylla Meghalaya bad ïa ki kynhun bapher bapher kiba don hapoh ka skulbah ban shimkhia bha ïa kane ka jingjia bad ban peitngor halor ki lad ki lynti ban shim da ki bor pynïaid jong ka NEHU khnang ba kan long kaba khuid kaba shai hakhmat ki paidbah,” la ong ka NEHUTA.
“Ngi sngewkhia haduh katta katta ïa ki jingshah thombor ka longryngieng jong kawei ka kynthei Referee ha u Asst. Sports’ Director u Nantu Das, ha kaba ka jingpyrshang jong u ban leh be-jot ïa ka lanot ka la mih tang ka jingpynrem. Ha ka jingshisha, kumba ka paw, u Nantu Das u dei uba la donkti la bunsien ha kine ki jait kam, katkum ka sakhi na ki katto katne ki kynthei kiba pynpaw ba ka jingjrongkti jong u Das uba shim kabu ïa ki kynthei haba don ki jingïalehkai sports,” la ong ka NEHUTA ha u kyrwoh ba la phah da u President u Prof. Lakhon Kma bad u General Secretary u Dr. Marbhador M. Khymdeit sha ki lad pathai khubr.
“Ki briew kum u Nantu Das ki dei ban ngat ha jingshah pynshitom. Bun tylli ki jingthombor ïa ki samla pule kynthei la leh da une u runar uba pyrshang ban pynjaboh ïa la ka kamram tang ban pynhun ïa la ka jong ka jingthrew shimet,” la kynnoh ka NEHUTA.
“Ka NEHUTA ka sngewkhia ba ka skulbah ka la phiel ban ïada na ki kam runar kiba ju jia na ka por sha ka por bad mynta ka kynti da u briew uba bat kum u Security-in-charge bad ka jingkylli kaba mih mynta long halor ka bha ka miat jong ki kynthei kiba kham bun kiba pule ha kane ka skulbah bad kiba ju ïashim bynta bha ha ki jingïalehkai sports bad kiwei kiwei ki kam hapoh ka skulbah,” la ong u kyrwoh bad bynrap, “naduh ka por jong u Prof. S. K. Srivastava, ki don ki riewsniew kiba pyndonkam bakla ïa la ka jong ka iktiar thombor ïa ka longryngieng.”