Thaw ka NEHUSU da ka komiti ban bishar ïa ki jingshah jrongkti ki kynthei ha University

By Mawphor News Desk On Nov 22, 2023

Shillong, Naiwieng, 21: Ka North Eastern Hill University Students’ Union (NEHUSU) ka la rai ban thaw da ka Gender Sensitization Committee hadien ba ka la don ka jingjia shah jrong kti jong ki kynthei hapoh ka skulbah North Eastern Hill University (NEHU).
Ha u kyrwoh ba la phah ha ka sngi Baar, u Finance Secretary ka NEHUSU u Mandor Diengdoh u la ong hadien ba ki khubor ki la poi sha ki paidbah, ki la don bun tylli ki jingjia kiba la kynnoh pyrshah ïa u Nantu Das, uba bat kum u in-charge jong ka Security bad u Asst Director jong ka Sports Department, NEHU ha kaba ka shithi ujor ka la poi sha ka NEHUSU.
U la ong, “hadien ba la bishar da ka NEHUSU ïa ki jingujor la lap ba u nongleh kam bymman u donkti bunsien ban leh ïa ki kam runar ha kaba ki lanot ki sheptieng ban kren na ka daw ba ki lehraiñ ban pynpaw ïalade hakhmat ka pyrthei.”
Hadien kane ka jingjia, u la ong, ki la don ruh ki jingujor na ki samla pule khamtam da ki Research Scholars kiba la kam ba u Guide jong ki, u don kti ha ki kam pohdor.
Da kaba pynpaw ba ka NEHUSU ka la ïoh pdiang bun tylli ki jingujor na kiba bun ki samla pule, u samla Diengdoh u la ong, “ka NEHUSU ka sngewdei ban don ïa ka jingpynsngewthuh ïa ka longkynthei ka longshynrang hapoh ka skulbah na ka bynta ki samla pule, ki nonghikai bad ki nongtrei.”
“Ka NEHUSU ha kaba ïadei bad kane, kan sa pynlong ïa ka jingpynsngewthuh lyngba ki jingïathir ïatai, ki jingïathir nia bad khamtam eh ban thaw ïa ka Gender Sensitization Committee ka ban shimkhia ïa ki jingshah thombor, ka jingpynkheiñ ïa ka jingmynjur bad kiwei kiwei de ki kam kiba ïadei bad kine ki jait kam,” la ong u kyrwoh.
“Bun ki jingjia kiba ïadei bad ki jingshah jrong kti kin sa nang paw pyrthei ha kine ki sngi ki ban sa wan namarba ki samla pule ki la nang kham ïohbor na ka jingïoh jingkyrshan bad ka jingai mynsiem sha ki samla pule da ka Union,” u la ong.
U la ong shuh shuh ba ka jingangnud jong ka Union ka long ban sngewthuh ïa ka jinglong kynthei jinglong shynrang bad ba ka shlem pule ka dei ban long kaba shngaiñ.
“Ka NEHUSU kaba mynta ka kut jingmut ban rat dyngkhong ïa kine ki kam pohdor da kino kino ki nongtrei, ki ophisar ne ki nonghikai pyrshah ïa ki samla pule,” la ong ka Union.