Shillong, Naiwieng 10: Ka kynhun ïalehkai kriket jong ka Meghalaya ka la shah khanglad ban khur ïa ka namjop ha ka Railways ha kaba ka la shah pynliem noh da 32 ron ha ka jingïakhun ba ladep jong ka Men’s U-23 State A Trophy, ka lympung lehkai hapdeng ki jylla ba la pynlong da ka BCCI.
Kane ka jingïakhun ka la long hapoh Chandigarh, kaba dei ka jaka ba ka Meghalaya kan pyndep baroh ki jingïalehkai. Hynrei phewse, ka kynhun ka la bteng namrem haduh mynta, da kaba shahrem ha ka Uttar Pradesh, Rajasthan, Assam, Andhra Pradesh, Bengal bad khadduh ha ka Railways.
Hadien ba jop ïa ka toss, ka Meghalaya ka la jied ban bol nyngkong bad ka la ïohlad ban pynhap baroh ki wicket jong ka Railways hapoh ka 47.2 over hynrei ka ron pat 219 ron. Kane ka dei ka sien ba nyngkong ïa ka Meghalaya ban ïoh pynhap baroh ki wicket jong ka kynhun ba ïakhun pyrshah.
U Aryan Borah u la long u ba seisohtam napdeng ki rangkawangbol da 3/30 naki 7.2 over. Kiwei pat kiba la khur wicket ha kane ka jingïakhun ki kynthup ïa u Badonnam J Mylliemngap (2/36 naki 10 overs), Manish Sharma (2/48 inaki 10), PM Santhosh (1/19 naki 5), Sudhir Sahani (1/30 in 7) bad u Agreas Chamcham Sangma (1/54 naki 8).
Ha kaba nyngkong ka Meghalaya ka la seisoh bha haba beh ïa ka ron, ha kaba u Sachin Kumar (41 naki 86 bol) bad u Nishanta Chakraborty (46 naki 25) ki la lah bna kyntiew 58 shuwa ban hap u wicket ba nyngkong.
Hynrei hadien katto katne por, Meghalaya ka sdang ban noh arsut hadien ka jinghap wicket u wei hadien u wei ha kaba ka la shah pynhiar sha ka 157 ron bad hap haduh 7 wicket.
Ha kaba kut ka , ka Meghalaya ka la ïohlad ban kynjoh tang sha ka 187 ron naki 44.5 over bad shah pynhap baroh ki wicket.
