Shillong, Naiwieng 10: Ka Meghalaya Boxing Association (MBA) hynne ka sngi ka la pynbna ba kan pynlong ïa ka jingpyrshang jied rangïakura (trial) naduh mynta ka sngi na bynta ban pynïakhun ha rynsan jong ka “7th Elite Men’s Boxing Championships” ka ban sdang shen ha ka 25 tarik mynta u Naiwieng, 2023, bad kane yn sdang naduh ka por 8 baje mynstep.
ïa kane la pyntip da u Bah Bah Larry Kharpran-Joint Secretary BFI ha kajuh ka por u ba long ruh u Organising Secretary jong kane ka lympung 7th Elite Men National Boxing Championships 2023.
Shuh shuh, na ka liang jong u Bah Kharpran u la pynpaw ba ka MBA ka khmihlynti ban sei madan kumba 10 ki rangïakura ka jylla ki ban sa shimbynta ha kane ka Championship napoh ka jylla.
“Ka jingïakhun kan long kaba jwat naba ki rangïakura ki ban wan shimbynta ha kane ka rynsan kin kynthuplang ïa ki khlur ba paw jong ka ri, hynrei watla kata ruh ngi kyrmen ba ki rangïakura ka jylla kin lehkai bha, bad ngi la sakhi ruh ba ki don katto katne ki rangïakura ba kynsai ba kynthup ïa u Badonkupar Synnah bad u Sanjeev Maskul kiba la lehbha ha ka East Zone Elite Men’s Boxing Championship kaba la long ha u Nailar, bad ngi khihlynti ba kin khur takma na kane ka rynsan ïakura ka ban long hala ïing,” la bynrap u Bah Kharpran.
Ka jingpynkhreh na bynta kane kan dang ïaid shakhmat, bad la antad ïa ka jinglut jingsep ban pynlong ïa kane ka lympung haduh Rs 1 klur, ka ban kynthuplang ïa ka bai bam bad kiwei kiwei.
