Nongpoh, Naiwieng 10: Ka Synjuk ki Rangbah Shnong Nongpoh Area kala pynliem noh ïaka party United Democratic Party haka jingïalehkai paralok mynta ka sngi ha madan NSCA Pahamsyiem kaba dei ruh shibynta ka prokram ai mynsiem bad ai jinghikai ka party UDP ïaki samla ba kin pynsmat ïalade haka kam kilan met ban lait jingmlien ba sniew khamtam u drok u ba la kynrei hakane ka juk ba mynta bala pynlong da ka UDP State Youth Wing haka jingïatreilang bad ka UDP Youth Wing Ri Bhoi.
Ha katei ka jingïalehkai phutbol paralok bala pynbud ruh da ka prokram ai jinghikai (Awareness Programme) halor ka jingma u drok la wan ban shimbynta da u Bah Metbah Lyngdoh State President ka party UDP haka jylla kum u kongsan haka jingdonlang u Bah Kyrmen Shylla President State Youth Wing ka party UDP ba dei ruh u myntri sorkar, Bah Jemino Mawthoh, Bah Mayral Born Syiem MLA ka Nongpoh, Bah Pius Marweiñ MLA Ranikor, Bah Synshar Lyngdoh Thabah MLA Sohiong, Bah Balajied Ranee MDC ka Nongpoh bad kiwei kiwei ki riew rangbah bad ki nongïalam ka party UDP na Ri Bhoi, ki khynnah skul bad ki samla pule College.
Haba phai sha ka jingïalehkai paralok ha katei ka sngi hapdeng ka party UDP bad ka Synjuk ki Rangbah Shnong Nongpoh Area, ka jingïakhun kala long kaba itynnad bad kaba ïakhaid bha bala pynshongshit ruh ïaki paidbah da ka jingshim bynta naduh u Bah Eugeneson Lyngdoh uwei naki rangïalehkai ba kynsai, Bah Kyrmen Shylla Myntri sorkar, Bah Pius Marweiñ MLA bad kiwei kiwei hynrei naduh bas dang ka kylla step haduh ba kut ka kylla miet ym shym don satia ba ioh thep kol ha kaba ki bor pynïaid kila rai ban pynshut da ka tie-breaker.
Dei haka jingïashut tie-breaker naka liang ka Synjuk ki Rangbah Shnong Nongpoh Area kala lah ban pynliem noh ïaka party UDP da 5-4 kol.
Ha katei ka sngi la pynlong ruh ïaka prokram ai jinghikai halor ka jingma u drok bad kiwei kiwei ki jait jingdih buaid ba kum ki samla kim dei ban ktah lane ban mad namar utei u jait jingdih u don ka bor kaba khlaiñ ban pynkyrni ïa u briew bad ka dei ka bynta jong uwei pa uwei u nongshong shnong ban shim ïaka jingkitkhlieh ban pynduh jait ïa utei u jait jingdih khamtam ban ïarap lang ruh ïakiba la kyrni ha utei u jait jingdih buaid.
