Lah ban shah weng ka Moitra na ka jinglong MP Lok Sabha: Ka ong ngan jop kput biang sa shisien

Shillong, Naiwieng 09: Kawei na ki MP bym ju riej ban kren pyrshah ïa ka sorkar jong u Modi, ka Muhua Moitra, kaba dei ka dkhot jong ka Lok Sabha jong ka All India Trinamool Congress (AITC) ka lah ba shah pynduh noh ka jinglong dkhot ha Parliament.
Ka daw ka long ba ka Ethics Committee jong ka Parliament ka la shim ïa ka rai ban tyrwa sha ka Parliament ban pynduh noh ïa ka jinglong dkhot jong ka, hadien ba ka la lap ba ka jingleh jong kane ka MP na West Bengal ka long pyrshah ïa ka jingtreikam ka Iingdorbar Thawaiñ ka ri India.
Ka Moitra ka la shah kynnoh na u MP ka BJP, u Nishikhant Dubey, ba ka la buh jingkylli pyrshah ïa u Gautam Adani, u Businesmen ba riewspah tam ha ri India bad uba don ka jingïadei kaba jan bad Narendra Modi. Lyngba ka jingïathuh uwei pat u Businessmen, uba kyrteng u Darshan Hiranandani. U Darshan, uba la ïoh ïa u Password Lok Sabha Account ka Moitra, u la ïathuh ba u la plie ïa ka Account jong ka haduh 47 sien ban ai ïa ki jingkylli sha ka Moitra ban kylli halor ka jingtreikam ka Kompeni u Adani.
Ka Ethics Committee, ka la khot hajir ïa ka Moitra ha kine ki sngi baladep ba kan jubab halor kine ki jingshah kynnoh khamtam eh halor ka jingai jong ka ïa u Password jong ka Parliament Account jong ka, ïa kaba ka Committee ka sngew ba kadei ka jingleh kaba lah ban ktah ïa ka shongsuk shongshngaiñ jong ka ri.
Hynrei ha kane ka jingleit hajir jong ka, la mih ka jingïakynad hapdeng ki dkhot kiba dei ki MP jong ka Liang Synshar bad ki dkhot kiba dei ki MP jong ka Liang Pyrshah. Ki MP ka Liang Pyrshah ki la phet noh ha shiteng ka jingïalang ban shim jingtohkit ïa ka Moitra da kaba kynnoh ba u Chairman ka Committee u la leh donbor bad khamtam eh u la buh jingkylli kiba la ktah shimet ïa ka Moitra bad kam ïahap satia bad ka jingshah kynnoh jong ka. Ka Moitra ruh ka la phet noh shiteng na kane ka jingshah tohkit jong ka, da kaba kynnoh ba ki rukom buh jingkylli ki la ktah ïa ka jinglong shimet jong ka.
Na ka liang ki dkhot kiba dei ki MP jong ka Liang Synshar ki la ong ba ka Moitra kam shym la ïatreilang bad ka Committee da kaba ka la kyntait ïa kiba bun ki jingkylli ba la buh hakhmat jong ka.
Ha kane ka rai ba ka Ethics Committee ka la shim ban tyrwa ne ban report sha ka Parliament ban weng noh ïa ka jinglong dkhot ka Moitra na Lok Sabha ruh, hynriew ngut ki dkhot ki la kyrshan, kynthup ruh ia kawei ka MP kaba la jop na ka Congress, kaba dei ka lok jong u CM barim ka Punjab, kaba la phet noh pat sha ka BJP. Katba saw ngut ki dkhot kiba dei na liang pyrshah kim shym la treh ban kyrshan ïa ka jingtyrwa ban weng dkhot ïa ka Moitra.
Hynrei hapdeng kine ki jingshah kynnoh bad ka jingmih khubor ban weng noh ïa ka kum ka MP jong ka Lok Sabha, ka Moitra kam shym la pyndem bad ong ba lada ka shah weng makna mynta kum ka dkhot jong ka Lok Sabha,kan sa wanphai biang sha ka Lok Sabha da ka jingjop kaba kham donburom shuh shuh ha ka elekshon ka ban wan.