Da kaba bam smai shimti u Bah Jason Lennox Nongrum kum u President ba pura ka Ri Bhoi People’s Council ha Ri Bhoi

Nongpoh, Naiwieng 04: Ban bteng ïa ka jingshakri ba pura na ka bynta ka bha ka miat ki paidbah ka dong Ri Bhoi kum kata ka seng kaba thymmai ba la suit la shor halor ki nongrim bapher bapher bad na ka bynta ba pynkhlaiñ ïa ka jingshakri kane ka seng ka la pynlong da ka jingïalang ban bam smai jong baroh ki nongïalam ha ka jingïalang. U Samla Jason Lennox Nongrum kum u President ba pura kane ka seng.
Ïa kane ka jingïalang pynbam smai ïa ki nongïalam ba pura jong kane ka seng la pynlong ha District Library Auditorium Hall, Nongpoh, ha kaba ha ka jingïalang u Samla Jason Lennox Nongrum kum u President ryngkat kiwei ki nongïalam ki la shim ïa ka jingsumar na ka bynta ban shim ïa kata ka lyngkor nongïalam ban ïalam ïa kane ka seng na ka bynta ban ai ka jingshakri ïa ki paidbah ka Ri Bhoi District katkum ka thong jong kane ka seng ba la suit la shor halor shibun ki nongrim ban shakri sha u paidbah.
Ha kane ka jingïalang bam smai ki nongïalam kane ka seng la wan ruh ban ai mynsiem da u Rev. Precious S Tmung, u President ka Ri Bhoi Dorbar, u Bah R.B Shadap, u Chairman ka Umsning Town Dorbar, u Bah Rocky Kylla, u Bah Plus Syiem, u Bah R.R Kynsai Makdoh, u Bah Najim Kharmalki, u Bah C.Wahlang kum ki riew rangbah ka Ri Bhoi bad kiwei kiwei ki riew rangbah bad ki dkhot kane ka seng.
Lyngba jong kane ka sngi ba ki nongïalam ka Ri Bhoi People’s Council ki la shim ïa ka jingsumar ban long kita ki nongïalam ba pura kane ka seng la ai mynsiem ruh ïa ki nongïalam ym tang da ki jingkyrmen ba don jingmut jong kitei ki nongïalam, hynrei la ai mynsiem ruh da ki jingrwai jong ki samla kiba la ai mynsiem ïa kine ki nongïalam ba kin shim shisha ïa kata ka lyngkor nongïalam na ka bynta ba ai ka jingshakri kaba bha Tam ïa ki paidbah ka Dong Ri Bhoi ba ka Ri Bhoi ka dang donkam shibun ki nongïalam kiba kloi ban ïa kren na ka bynta ban pynbit pynbiang ïa shibun ki jingsumar kiba dang duna ha kane ka District.
Ha kane ka sngi ruh, nalor ka jingkren kitei ki riew rangbah kiba la ai jingkyrshan bad ai mynsiem ïa kane ka seng ba thymmai, la ioh ruh ka jingkren da Samla Jason Lennox Nongrum u la kren ban pynpaw halor ka nongrim ka seng bad ka daw kaba la pynlong ban suit ban shor thymmai ïa kane ka seng ka dei namar ba don shibun ki daw kiba ka seng ka angnud ban trei ba ka bynta ka ïap ka im jong ki paidbah ha them Ri Bhoi. U la pynpaw ruh da kaba ong ba ka jingmih jongka Ri Bhoi Peoples’ Council kam dei kaba ngi kwah burom ne ban ioh long nongïalam, hynrei ki don shibun ki daw ba kane ka seng ka angnud ban dang trei ba ka bynta ban wan rah ïa ka jingkylla hapoh ka them Ri Bhoi District.
Shuh shuh, u la ong ruh dang don shibun ki bynta ba ka seng ka angnud ban trei na ka bynta ki paidbah ka Ri Bhoi District, hynrei ïa mynta kim pat lah ban pynpaw pyrthei ha kaba ka seng kan dang buddien bad ka jingthmu hi ka long ym dei tang ka seng ka ban kren ïa ka eh ka shon ne ka kam ïap ka kami m jong ki paidbah ha Ri Bhoi, hynrei ka seng ka kwah ban ïa trei lang ha kaba ka donkam ïa shibun ki jingkyrshan jong ki paidbah ban pynurlong ïa kiba bun ki mat ki jura kiba ktah ïa ki paidbah ka Ri Bhoi District, u la bynrap.