Plie paidbah u Myntri Sorkar Pdeng ïa ka hospital multi-speciality ha Sivasagar, Assam

Shillong, Naiwieng 04 :U Myntri Sorkar Pdeng ba dei khmih ïa ki tnat Petroleum & Natural Gas bad Housing & Urban Affairs, u Hardeep Singh Puri u la ong, “Katkum ka jingïeng skhem u Myntri Rangbah Duh, u Narendra Modi na ka bynta ka thain shatei lammihngi, ka Sorkar bad ki kynhun public enterprise kum ka ONGC ki ïeng skhem ban kyntiew ïa ka jingim ha ka thain shateilammihngi.”
U la ong ïa kane ha ka prokram ba la long ha Sivasagar, Assam, hadien ba u la pliepaidbah ïa ka hospital multi-speciality ba ai jingkyrshan ka ONGC ha kane ka jaka. Ha kane ka prokram la wan ïashim bynta lang da u Myntri Khynnah ki tnat Petroleum and Natural Gas bad Labour and Employment, u RameshwarTeli, u Chairman bad CEO, ONGC, uArun Kumar Singh, bad ruh ki ophisar na ka Sorkar Assam bad ka ONGC.
Ha ka jingai jingkren jong u, u Myntri u la ong ba ki jingdon jingem katkum ka juk mynta bad ki tiar ai jingsumar jong ka Siu-Ka-Pha hospital ki long kiwei na kiba bha tam ha ka ri bad ba kane kan ai jingïarap bha ïa ki briew jong ka Upper Assam, bad ruh ki briew na ki jylla ba marjan kum ka Nagaland, Mizoram bad Arunachal Pradesh. Ha kine ki snem ban wan, la antad ba ka Siu-Ka-Pha hospital kan ai jingsumar ia kumba 1 lak ki nongpang ha ka shi snem, u la ong.
U Myntri Khynnah ka tnat Petroleum and Natural Gas, uRameswarTeli, u la ong “Ka Siu-Ka-Pha Hospital, kaba la shna kum kawei na ki kam CSR ba heh tam jong ka ONGC, ka long kaba ai ki jingsumar katkum ka juk mynta bad kane kan ïarap shisha ïa ki briew na kane ka thain.”
Ïa kane ka Multi Speciality Hospital la shna ha ka jingbei tyngka kaba T 483.19 klur, kaba long ka dak jong ka jingtrei ka ONGC ban kyntiew ïa ka imlang sahlang ha ki jaka ba ka pyntreikam. La antad ba kane ka jaka ai jingsumar kan ai jingshakri ïa kumba 1 lak ngut ki nongpang ha ka shi snem.
Ïa kane ka hospital yn pynïaid da u Dr.Babasaheb Ambedkar Vaidyakiya Pratisthan (BAVP). Kane ka hospital ka don ha ka jaka kaba palat 35 acre, ka don 300 tylli ki jingthiah nongpang, bad ka kynhun jong 70 ngut ki doktor ba la pyntbit bad ka ai shibun ki jingshakri ha ka jingsumar kiba kynthup ka Orthopaedics, Trauma, Paediatric & NICU, Obstetrics, Gynaecology, ENT, Skull base Surgery, Physiotherapy, Rehabilitation, bad advanced diagnostics.
Ka don ïa ki modular operating theater, ka critical care unit bad telemedicine, kaba pynïasoh ïa ki nongpang bad ki nongai jingsumar ba la pyntbit na kylleng ka ri.
Ka ONGC Siu-Ka-Pha Multi Specialty Hospital ka pynkhlain shuh shuh ïa ki lad ai jingsumar ha Assam bad ki jaka hajan jong ka. Ki briew kin ym donkam ban leit sha Dibrugarh ban ïoh jngsumar.
Ha ryngkat ka thong ba nyngkong kaba long ka jingpynbiang ïa ki lad ai jingsumar, ka ONGC Siu-Ka-Pha Multi Specialty Hospital kan don ka bynta kaba khraw ha ka jingplie lad ïoh kam bad ki lad kamaijakpoh ha kane ka thain. Ka long kum ka dak jong ka jingkiew shaphrang, ka roi ka par bad ka bha ka miat jong ki briew ka Sivasagar.
Ka ONGC Siu-Ka-Pha Multi Specialty Hospital ka la aiti ïalade sha ka jingai jingsumar katkum ka juk mynta ïa ki briew ka Assam ki bym ïoh lad ban ïoh ïa kane mynshuwa.