Khynñiuh jumai biang ha Nepal iap palat 130 ngut mynsaw bun bad julor jur ki ïing ki sem

Shillong, Naiwieng 04 : Haduh kumba 128 ngut ki briew ki la duhei ia la ka jingim bad da ki phew ngut ki la mynsaw jur hadien ba u jumai uba jur u la wan ban lyngshop kynsan ha ki bynta phang sepngi jomg ka Jajarkot.
La ong ba katei ka jingkhynñiuh u jumai ka la jia ha ka por 11.47 baje ei ei mynmiet jong ka sngi Thohdieng ha kaba ka jingkhlain jong u ka la poi haduh kumba 6.4, ong ka National Seismological Centre jong ka Nepal. Na ka liang ka German Research Centre for Geosciences ka la ong ba katei ka jingkhlain u jumai ka la hiar sha ka 5.7 katba ka U.S. Geological Survey pat ka thew ha ka jingkhlain ba 5.6.
Lah ban kdew hangne ruh ba utei u dei u jumai uba khlainbor tam naduh u snem 2015 ha kaba ki don palat 9000 ngut ki briew kiba la iap ha ki ar tylli ki jingjia khynñiuh jumai ha katei ka Ri. Ha ka jingjia ha utei u snem baroh ki jingtei sahnam, ki temple bad ki jingteinam u barim ki la khyllem lut kaba la poi da ki lak tylli ki iing kiba la lko phum bad ka jinglut jingsep ka la kot sha ka $6 billion.
Ki bor sorkar ha katei ka ri ki ong ruh ba ki briew kiba khlad na ka daw jong utei u jumai ha kane ka sngi Thohdieng ki lah ban nang kiew namar bun ba ym pat lah ban buddien lut khamtam ha kito ki jaka ba khynñiuh nyngkong.
Ka jingdon kiba mynsaw ka lah ban poi sha ki spah ngut ruh bad ka jingdon kiba iap ka lah ban nang kiew ong ki bor sorkar na ka Jajarkot Distrik.