Halor u Lum Tiniang pynlong jingïalang ka seng ki nongshet ja sngi ka Ri-Lum Jaiñtia

Jowai, Naiwieng 04: Ka seng ki nongshet ja sngi haki skul, ïa kaba la tip kum ka All Jaiñtia Midday Meal Workers Union (AJMDMWU) hynnin ka sngi 3 tarik u Naiwieng kila pynlong ïaka jingïalang ne ka 4th Annual General Meeting ha kaba ki dkhot jong kane ka seng na ki Block bad ki District kila poi sha kane ka sngi halor jong u Lum Tiniang u Lum ba don ïa ka nam jong ka ïathuhkhana shaphang ka Syiem Latympang kaba hap hapoh ka Laskeiñ Block jong ka shnong Mowtyrshiah.
Ïa ka jingïalang ha kane ka sngi la pynïaid da ka Philoris Syngkon, President ka AJMDMWU Laskeiñ Block, haka jingdonlang u Khroo Lamsalanki Pariat, Adviser AJMDMWU uba la pynsngew khyndiat shaphang ka Syiem Latympang, u Waheh Chnong Mowtyrshiah, kumjuh na ki briew sorkar kiba dei peit ïaka skim PM Poshan hapoh ka jylla ba kynthup ïa u Asoo Suchiang naka PM Poshan Cell ka Directorate Shillong bad u O.B. Kurbah, Senior In-charge Consultant PM Poshan kiba la pynsngew shaphang ki skim bapher bapher.
Ha kane ka sngi la ïoh ruh ban pynsngew ïa ka rukom treikam jong ka seng da u President AJMDMWU Jaiñtia Hills samla Jery Anderson Suting, kumjuh na ka Joyciful Lypon, Secretary AJMDMWU, Jaiñtia Hills kala la pynsngew ïa ki jingkhieñ jingdiah halor ka jingïoh bad ka jingpynlut na ka bynta u snem 2021-22.
Ha ka juh ka sngi la pynskhem ïa ki nongkitkam ka seng da ka kong Banalis Syiem, President Union of Cook Cum Helper PM Poshan Meghalaya kiba kynthup ïa u Jery Anderson Suting kum u President, ka Biiola Iakai, Vice-President, ka Joyciful Lypon, General Secretary, ka Arkini Lytan, Assistant Secretary bad ka Rimika Challam kum ka Treasurer.
La pynphuh pynphieng shuh shuh ïa kane ka sngi da ki jingshad bala shim bynta lang da ki dkhot ka AJMDMWU jong ka Shangpung Unit bad na ki dkhot ka Iooksi Unit.