Suba phet ka longkmie bad u bar jylla, khang tala ka HYC bad shnong Riwiang ïa ka karkhana Ferro Aloy

Nongstoiñ, Nailur, 22: Ka Hynñiewtrep Youths Council (HYC) West khasi Hills ryngkat ka Dorbar Shnong Riwiang, hynne ka sngi thohdieng, ki la hiar khang tala ïa ka Ophis jong ka karkhana Ferro Alloy kaba don ha Riwiang namar ka jingsuba shah rahbor kawei ka longkmie ha u nongtrei kane ka karkhana u ba dei u bar jylla.
Ka HYC bad ka Dorbar Shnong ki la shim ïa kane ka sien jam halor ka jingjah jong kawei ka Longkmie ïa kaba la suba jur ba ka shah rahbor ha uwei u nongtrei ka karkhana.
Katkum ka khubor Pulit, kane ka Longkmie kaba jah (ba la buhrieh kyrteng) ka dei na ka Shnong Riwiang. Kane ka longkmie ka la jah naduh ka 16 tarik Nailur. Ki pulit ki la ïathuh ruh ba kiba haïing hasem ki la ujor da ka ejahar halor kane ka jingjah kane ka longkmie.
Ym tang katta, ki Pulit ki ïathuh ba ki ba haïing hasem ki suba jur ba kane ka longkmie ka la jah bad uwei u briew ba kyrteng u Mridul Boro, u ba trei ha ka Shakhambari Ferro Alloy Company, Riwiang.
Katba na ka liang ka Dorbar Shnong pat ka ïathuh ba ha ka 20 tarik Nailur, ka Shnong leit ban khang tala ïa kane ka karkhana halor ka nongrim ba ki bor pynïaid kim shym la lah ban teh lakam ïa la ki jong ki Nongtrei.
Ka Shnong ka la buh kyndon ba ki bor pynïaid kim lah ban plie ïa ka karkhana, katba kim pat lah ban wan ïalam noh ïa kane ka longkmie bad ïa une u briew. Hynrei la kynnoh ba ka karkhana ka la kyndang noh ïa kane ka tala ha ka sngi kaba bud, kata ha ka 21 tarik.
Namar ka jingshem ïa kane ka jingleh donbor ka kompani, ka Dorbar Shnong ka la kyrpad ïa ka HYC West Khasi Hills ban wan tuklar bad ban ïarap lem ïa ka Dorbar Shnong ha ka ban khang tala ïa kane ka karkhana.
U President ka HYC Samla Lumlang Kharsyiemlieh u la ong ba ka Shnong ka la kyrpad ïa ka Seng ban ïarap bad ka Seng ka ai ka jingkyrshan ba pura ïa ka Dorbar Shnong, haba maham ba kane ka kompani ka dei ban wan ïalam shuwa ïa katei ka longkmie ba jah, lym kumta kan ym ïohlad satia ban plie biang ïa ka karkhana.
Ka HYC ka la maham jur ruh ïa ki bor pynïaid ka kompani ba kim dei ban plie ne kyndang ïa ka tala katba kim pat lah ban pynurlong ïa ki kyndon ba la buh.